Oliy liganing birinchi davrasini ajoyib tarzda o‘tkazgan “Qo‘qon-1912” jamoasi a’zolari qisqa muddatli ta’tilga chiqdi.

Bosh murabbiy No‘’mon Hasanov jamoa a’zolariga 9 iyulga qadar dam olish uchun ruxsat berdi. Rejaga ko‘ra 9 iyuldan 21 iyulga qadar jamoa Toshkent viloyatida navbatdagi o‘quv-yig‘in mashg‘ulotlarini olib boradi. Bu yig‘in davomida jamoa tarkibida o‘zgarishlar bo‘lishi mumkin. Murabbiylar shtabi jamoani kuchaytirish maqsadida ayrim futbolchilar bilan muzokaralar olib borishmoqda. Shuningdek navbatdagi yig‘in davomida Oliy liga klublari bilan o‘rtoqlik o‘yinlari ham o‘tkaziladi.

Jamoaning syerbiyalik futbolchilari Darko Gojkovich hamda Filip Rayevas davralar oralig‘idagi tanaffusdan foydalanib o‘z yurtiga jo‘nab ketdi. Bu futbolchilar jamoaning navbatdagi o‘quv-yig‘inlariga biroz kechroq kelib qo‘shiladilar.

Oybek Rustamov, Javohir Sidiqov hamda Andrey Sidorov O‘zbekiston U-22 bilan birga Qatar davlatida bo‘lib o‘tayotgan halqaro turnirda ishtirok etmoqda.

Jamoa a’zolari navbatdagi rasmiy uchrashuvni 26 iyul kuni Qo‘qonda o‘tkazishadi. Shu kuni O‘zbekiston kubogi chorakfinali javob uchrashuvini o‘tkazish uchun Qarshining “Nasaf” jamoasi Qo‘qonga tashrif buyuradi.