Poytaxtimizda ayollar o‘rtasida  tennis bo‘yicha Tashkent Open 2017 musobaqasi start oldi.

25 sentyabr kuni juftliklar o‘rtasida birinchi davra bahslari bo‘lib o‘tdi. E’tiborli jihati, ushbu bahslar bir qator o‘zbekistonlik tennischilar kortga chiqishdi. Jumladan, Oqgul Omonmurodova – Nigina Abduraimova juftligi hamda Ana Bogdan – Shtefan Fyogel o‘rtasida kechgan match ancha qiziqarli o‘tdi. 3 set davom etgan uchrashuv super taybrekkacha davom etdi. Yakunda Ruminiya va shveysariyalik sportchilar juftligi 3:6, 7:5, 10:6 hisobida g‘alabaga erishdi.

Kunning eng e’tiborli voqeasi, bu albatta o‘zbekistonlik mashhur tennischi Iroda To‘laganovaning ko‘p yillik tanaffusdan so‘ng katta tennisga qaytishi bo‘ldi. 35 yoshli tennischi Tashkent Open juftlik bahslaridagi ishtirokini chexiyalik Kristina Plishkova bilan sheriklikda Ipek Soylu va Irina Xromacheva juftligiga qarshi boshladi. Respublika Olimpiya zahiralari tennis maktabi markaziy kortida o‘tgan ushbu uchrashuvni kuzatishga kelgan muxlislar Iroda To‘laganovani qo‘llab quvvatlab turishdi. Afsuski, 58 daqiqa davom etgan mazkur uchrashuv 6:2, 6:4 hisobida Turkiya va rossiyalik sportchilar juftligi g‘alabasi bilan yakunlandi.

Eslatib o‘tamiz, sovrin jamg‘armasi 226 750 AQSH dollarini tashkil qiluvchi ushbu turnir 30 sentyabrgacha davom etadi. Ayni shu kuni yakkalik va juftlik bahslarida g‘oliblar aniqlanadi.