Shu yilning 30 sentyabr, shanba kuni Buxoroda katta futbol bayrami.
Shu kuni oliy liganing 23-turidan o‘rin olgan “Buxoro” – “Metallurg” uchrashuvi bo‘lib o‘tadi.
Mazkur bahs qizg‘in va tomoshabop ruh ostida o‘tishi kutilmoqda. Bo‘lajak o‘yin olidan e’tiboringizga qiziqarli ma’lumotlarni taqdim etamiz.
BEKOBOD JAMOASI HAQIDA QISQACHA
Toshkent viloyati, Bekobod shahri jamoasi bo‘lmish “Metallurg” futbol klubiga 1945 yili asos solingan. Jamoaning nomi 1945 yildan to 1968 yilga qadar “Bekobod” deya yuritilgan. 1969-1991 yilllar davomida “Sementchi” deya atalgan. 1992-1997 yillar oralig‘ida esa “Mavdanchi” nomi berilgan. 1998 yildan to shu kunga qadar esa “Metallurg” nomi ostida chempionatda ishtirok etib kelmoqda.
“Metallurg”ning oliy ligadagi ishtirokiga yaqinda 20 yil to‘ladi.
Jamoaning oliy ligada egallagan eng yuqori o‘rni 5-o‘rindir. 2002 yilgi mavsumni bekobodliklar yuqori notada o‘tkazgandi.
Bosh murabbiy Rustam Mirsodiqovning 2008 yildan buyon “Metallurg”ni boshqarib kelayotgani tahsinga loyiqdir. Bir jamoani uzoq vaqt boshqarish borasida Rustam To‘xtamurodovich hozirgi kunda oliy liga klublarining murabbiylariga yaxshigina saboq bermoqda.
O‘TTIZ SAKKIZINCHI TO‘QNASHUV
“Buxoro” va “Metallurg” shu kungacha o‘zaro 37 marta to‘qnash kelgan. Demak ertangi bahs ularning 38-qarama-qarshiligidir. O‘zaro o‘yinlar natijasiga ko‘ra ustunlik birozgina bekobodliklar tomonida. Sababi “Metallurg” 17ta bahsda muvaffaqiyat qozongan. “Buxoro”ning esa 16ta uchrashuvda qo‘li baland kelgan. Qolgan 4ta o‘yinda tomonlar durangga imzo chekkan.
To‘plar nisbati bo‘yicha ustunlik buxorliklardar. 37ta uchrashuvda 52ta gol! “Metallurg” esa 51ta to‘p kiritgan. “Buxoro”ning “Metallurg” ustidan qozongan eng yirik hisobdagi g‘alabasi 4:0ga teng bo‘lsa, “Metallurg”da bu borada ko‘rsatkich, 3:0.
O‘zaro o‘yinlarda “Buxoro” 52 ochko jamg‘argan. Bekobodliklar esa 55ta.
BIRINCHI DAVRADA “BUXORO”NING QO‘LI BALAND KELGANDI
29.04.2017. 8-tur.
“Metallurg” – “Buxoro” - 1:2 (0:1)
Bekobod. “Metallurg” stadioni. 1429 tomoshabin.
Hakam: Valentin Kovalenko – 9.
