Bugun “Nasaf” o‘z maydonida “Qizilqum” jamoasi bilan bahs yuritdi. Uchrashuvda “ajdarlar” 2:0 hisobida g‘alaba qozondi.
Uchrashuvdagi hisob 1-daqiqadayoq jamoamiz tomonidan ochildi. Tezkor ilk hujum va darvozaga ilk zarba golga aylandi. Bunda chap qanotdan Jasur Hasanovning oshirib bergan to‘pini Bahrom Abdurahimov darvozaga joylab qo‘ydi – 1:0. Bu gol Bahrom Abdurahimov hisobiga bu yilgi chempionatdagi oltinchi goli sifatida yozib qo‘yildi. Bahrom Abdurahimov joriy chempionatda “Nasaf”ning ilk goliga mualliflik qilgan bo‘lsa, endi jamoamizning eng tez kiritilgan goliga ham muallif bo‘ldi.
Shuni alohida ta’kidlash joizki, jamoamiz bugun ham hujumkor o‘yin namoyish etdi. Maydonda raqibiga nisbatan ustun bo‘ldi.
Albatta hujumlar juda ko‘p bo‘ldi, ammo vaziyatlardan foydalanilmadi. Shu o‘rinda “Qizilqum” jamoasining ham yaxshi himoyalanganini e’tirof etish joiz.
Birinchi bo‘lim ana shu hisobd yakuniga yetdi.
Ikkinchi bo‘lim ancha shiddatli bo‘ldi. Mehmonlar ham hisobni tenglashtirish uchun bor kuchi bilan harakatlandi. Ikkinchi bo‘limda ular biroz ustunlikka erishgan daqiqalar ham bo‘ldi. Ammo jamoamizning ularga nisbatan himoyada ham, maydon markazida ham va hujumda ham katta bosim bilan qilgan harakatlari, ularning maqsadini puchga chiqardi.
Ikkinchi bo‘limning ikkinchi yarmi juda shiddatli kechdi. 70-daqiqada “Nasaf” darvozadan ancha uzoq masofada jarima to‘pi tepadigan bo‘ldi. Jarima to‘pi Jasur Hasanov tomonidan ajoyib tarzda amalga oshirildi. Har doim bunday vaziyatlarda raqib darvozasi oldida hozir bo‘ladigan tajribali himoyachimiz Igor Golban, bu safar ham shay turgan edi. U tashlab berilgan to‘pni boshi bilan darvozaga yo‘lladi va to‘p darvoza to‘ridan joy oldi – 2:0. Igor Golban bu bilan mavsumdagi 3-golini o‘z hisobiga yozdirib qo‘ydi. Tajribali yarim himoyachimiz Jasur Hasanovning jamoamiz yutuqlariga qo‘shayotgan hissasi o‘yindan-o‘yinga oshib bormoqda. Hasanov bugungi ikki golga ham hammualliflik qilganini e’tirof etish joiz.
O‘yinda hisob yirikroq bo‘lishi ham mumkin edi. Afsuski ko‘p vaziyatlarda gol urish uchun o‘yinchilarimizda omad yetishmadi.
Shunday qilib “Nasaf” ketma-ket beshinchi g‘alabasini nishonladi. Albatta kerakli va qimmatli ochkolarni yig‘ishda davom etmoqda. Jamoamizning yutuqlari ana shunday bardavom bo‘lishini umid qilib qolamiz.
“Nasaf” navbatdagi uchrashuvni 7 oktyabr shanba kuni yana o‘z maydonida o‘tkazadi. Shu kuni jamoamiz O‘zbekiston Kubogi-2017 yarim finali javob uchrashuvida “Lokomotiv” jamoasi bilan bahslashadi.
O‘zPFL 23-tur
“Nasaf” (Qarshi)–“Qizilqum” (Navoiy) 2:0 (1:0). 4638 nafar tomoshabin
30.09.2017. “Markaziy” stadioni. 18:00da
Bosh hakam: Sherzod Qosimov (Toshkent)
Gollar: Bahrom Abdurahimov, 1’-1:0, Igor Golban, 70’-2:0
“Nasaf”: 35.Sanjar Quvvatov, 2.Akmal Shorahmedov (s), 6.Azizjon G‘aniyev (5.G‘olib G‘aybullayev 90+3), 7.Odiljon Hamrobekov (27.Islom Rashidxonov 88), 18.Bahrom Abdurahimov, 20.Islom Kenjaboyev (45.Bobir Abduxoliqov 90+3), 22.Igor Golban, 34.Farruh Sayfiyev, 69.Dragan Cheran, 77.Jasur Hasanov, 92.Umarbek Eshmurodov.
“Qizilqum”: 55.Erkin Jabborov, 2.Viktor Grigoryev, 3.SHukurali Po‘latov, 4.Erkin Boydullayev (s), 6.Nodirxon Kamolov, 9.Otabek Zokirov (77.Bkgzod G‘anijonov 90), 17.Artur Gevorkyan, 18.Samandar Shodmonov, 23.SHerali Jo‘rayev, 89.Otabek Isroilov (20.G‘ayrat Jumayev 76), 92.Akmaljon Baxritdinov.
Ogohlantirish: Odiljon Hamrobekov (62) - Sherali Jo‘rayev (28), Akromjon Baxritdinov (55)
