Angliya chempionatining 7-turi doirasidagi markaziy o‘yin yakuniga yetdi. Londondagi "Stemford Brij" stadionida "Chelsi" ushbu mavsum yetakchisi — "Manchester Siti"ni qabul qildi. O‘tgan mavsumda bo‘lib o‘tgan ushbu jamoalar o‘rtasidagi har ikkala to‘qnashuvda Konte jamoasi g‘alaba qozongandi. Bu safar esa Gvardiola raqibdan chiroyli tarzda o‘ch oldi.

"Shaharliklar" butun o‘yin davomida har tomonlama "Chelsi"dan ustunlik qilishdi — to‘p nazorati, zarbalar, xavfli vaziyatlar, tezlik va pressing. Mehmonlar "aristokratlar"ga o‘z o‘yinini namoyish qilishga imkoniyat berishmadi. Aksincha, "Siti" vaqt o‘tgan sari o‘z ustunligini oshirib bordi va ikkinchi bo‘limda g‘alaba to‘pini kiritishga muvaffaq bo‘ldi. Bahsning 67-daqiqasida Kevin de Bryuyne 20 metrlardan kuchli zarba bilan "Chelsi" darvozasini ishg‘ol qildi!

O‘yin tugashiga 5 daqiqa qolganida manchesterliklar ikkinchi golni urishlari kerak edi, ammo Ryudiger "Chelsi"ni muqarrar goldan qutqarib qoldi. Mehmonlar xavfli hujum tashkil qilishdi va Jezus jarima maydonchasi ichida zarba yo‘lladi. To‘p Kurtuadan o‘tib ketdi, ammo Ryudiger bosh bilan zarbani qaytarishga muvaffaq bo‘ldi.

Mazkur g‘alaba tufayli "Manchester Siti" bir necha soatdan keyin yana APL peshqadamligi qaytdi. Jamoa 19 ochko to‘plagan holda to‘plar farqiga ko‘ra "MYU"ni ortda qoldirmoqda.

APL, 7-tur
«Chelsi» – «Manchester Siti» – 0:1 (0:0)
Gol: De Bryuyne 67
«Chelsi»: Kurtua, Kristensen, Keyxill, Alonso, Ryudiger, Kante, Bakayoko (Batshuayi 73), Fabregas, Aspilikueta, Azar (Pedro 72), Morata (Villian 35).
«Manchester Siti»: Ederson, Uoker, Stounz, Otamendi, Fernandinyo, Delf, De Bryuyne (Danilo 90+3), D. Silva (B. Silva 76), Sane (Gyundogan 84), Sterling, Jezus.
Ogohlantirishlar: Fernandinyo 61, Otamendi 89.