Gollandiya terma jamoasi bu safar ham yirik musobaqaning final bosqichida ishtirok eta olmaydigan ko‘rinadi. JCH-2018 saralash bosqichining "A" guruhida o‘tkazilgan 9-tur o‘yinlaridan keyin niderlandiyaliklarning ahvoli ancha og‘ir bo‘lib turibdi.
Ushbu guruhda Fransiya 20 ochkoga ega bo‘lib turgan bo‘lsa, Shvesiya hisobida 19, Gollandiyada esa 16 ochko bor. Gollandlar so‘nggi turda o‘z uylarida Shvesiyani qabul qilishadi. Bu bahsda shunchaki g‘alaba mezbonlar uchun kamlik qiladi. Dik Advokat shogirdlari Shvesiyani yirik hisobda mag‘lub etishlari kerak, ancha yirik...
| № | Jamoa | O‘yin | G‘alaba | Durang | Mag‘lubiyat | T-N | Ochko |
|---|---|---|---|---|---|---|---|
| 1 | Fransiya | 9 | 6 | 2 | 1 | 16-5 | 20 |
| 2 | Shvesiya | 9 | 6 | 1 | 2 | 26-7 | 19 |
| 3 | Gollandiya | 9 | 5 | 1 | 3 | 19-12 | 16 |
| 4 | Bolgariya | 9 | 4 | 0 | 5 | 13-18 | 12 |
| 5 | Belarus | 9 | 1 | 2 | 6 | 5-19 | 5 |
| 6 | Lyuksemburg | 9 | 1 | 2 | 6 | 7-25 | 5 |
Shvesiya 9-turda Lyuksemburgni 8:0 hisobida mag‘lub etganidan keyin to‘plar farqini 26-7 ko‘rinishga keltirib oldi (+19). Gollandiyada esa bu ko‘rsatkich 19-12ni tashkil etadi (+7). Ko‘rib turganingizdek, niderlandiyaliklar to‘plar farqiga ko‘ra shvedlardan 12ta to‘pga ortda qolishmoqda. So‘nggi turda Gollandiyani 6ta to‘p farqi bilan g‘alaba ham qanoatlantirmaydi. Boisi, to‘plar farqi tenglashgani bilan, urilgan gollar soni bo‘yicha Shvesiya oldinda bo‘ladi (eslatib o‘tamiz, ochkolar teng bo‘lib qolgan holatda birinchi navbatda to‘plar nisbati inobatga olinadi).
Shu bois, Gollandiya 10 oktyabr kuni o‘z uyida Shvesiyani 7ta to‘p farqi bilan mag‘lub etishi shart. Shunda jamoa JCH-2018 saralashining pley-off bosqichiga chiqadi. Aks holda Gollandiya Rossiya-2018ga bora olmaydi, xuddi Yevro-2016dan quruq qolgandek!
