“Erudit SPORT” gazetasi quyida ushbu haftaning tomoshabop o‘tishi kutilayotgan eng markaziy to‘rt to‘qnashuvni o‘tkazib yubormaslikni tavsiya qiladi:
№4-match: “REAL” Madrid – “SEVILYA”
9 dekabr, shanba, soat: 20:15
TV-translyasiya: «UzReport TV»
O‘zaro uchrashuvlar:
77 G‘ALABA 26 DURANG 43 G‘ALABA
So‘nggi uchrashuv: “Real” Madrid – “Sevilya” 1:2 va 4:1
Imkoniyat: 40/30/30
Jamoalarning transfer qiymati:
“Real” Madrid – “Sevilya”
743,80 million yevro VS 229,75 million yevro
O‘yin haqida ikki og‘iz:
O‘xshatmasdan uchratmas, mezbonlar ham, mehmonlar ham joriy mavsumda beshta bahsda g‘alabani qo‘ldan chiqardi. Natijada “Real” o‘n ikki ochkoning boshiga yetdi. “Sevilya” tomonlarda 15 ochko “qulog‘ini ushlab ketdi”. Shunday ekan, qarama-qarshilik ishtirokchilarining kun tartibidagi birinchi masala – yaqinlashayotgan uchrashuvlarda ochko yo‘qotmaslikdan iborat. “Qizil-oqlar” ustozi Eduardo Berisso saraton xastaligiga chalingani ma’lum bo‘lgach, hamkasbini “Biz sen bilanmiz”, deb qo‘llab-quvvatlagan Zidan u bilan ro‘para bo‘ladi. “Sevilya” argentinalik mutaxassis qo‘l ostida yomon o‘yin ko‘rsatmayapti, o‘rtacha 1,90 ochko ishlayapti. Faqat raqib maydonidan quruq qo‘l bilan qaytayotgani muxlislarni havotirga solyapti (barcha mag‘lubiyati mehmonda qayd etilgan). Safar uchrashuvlarida raqib darvozasiga yo‘l topishda ham muammoga uchrayapti. Boshqa tomondan, “Real” darvozasiga kiritilgan to‘plarning 55 foizi mezbonlik qilgan o‘yinlara to‘g‘ri keladi.
№3-match: “LIVERPUL” – “EVERTON”
10 dekabr, yakshanba, soat: 19:15
TV-translyasiya: «FutbolTV»
O‘zaro uchrashuvlar:
76 G‘ALABA 63 DURANG 57 G‘ALABA
So‘nggi uchrashuv: “Liverpul” – “Everton” 1:0 va 3:1
Imkoniyat: 40/30/30
Jamoalarning transfer qiymati:
“Liverpul” – “Everton”
514,50 million yevro VS 335,25 million yevro
O‘yin haqida ikki og‘iz:
“Liverpul derbisi” – shahar “Ko‘klar” va “Qizillar”ga burkanadigan, bo‘linadigan kun. “Everton” ishqibozlari Sem Ellardaysning qadami qutlug‘ kelib, 13 o‘yindan iborat g‘alabasiz seriyaga chek qo‘yishi haqida o‘ylayotgan bo‘lsa, “Liverpul” fanatlari Yurgen Klopp shogirdlari kamida bir ochko ishlashiga ishonmoqda. Chunki “Mersisaydliklar” o‘z uyida to‘qqiz turdan beri mag‘lubiyat nimaligini bilmayapti. “Qassobga yog‘, echkiga jon qayg‘usi”, deb shunga aytishsa kerak. So‘nggi yetti yildagi o‘zaro uchrashuvlar statistikasiga ko‘ra, durang “Irislar” uchun eng yaxshi natija hisoblanadi. Shu kecha-kunduzda Premyer ligada uch jamoa mehmonda g‘alaba nashidasini surish baxtiga muyassar bo‘lmadi. Ular orasida Ellardaysiga ishonib topshirilgan “Everton” ham bor (umuman olganda, bu ko‘rsatkich 15 matchni tashkil qilmoqda). Bundan tashqari, mehmonlar darvoza daxlsizligini saqlashda ham “oldi jamoalar”dan. “Vest Xem Yunayted” hamda “Stok Siti”dan so‘ng eng ko‘p gol o‘tkazib yuborgan uchinchi klub. Gapning po‘stkallasi, “Katta Sem” nuqta qo‘yishi kutilayotgan muammolar talaygina.
№2-match: “YUVENTUS” – “INTER”
9 dekabr, shanba, soat: 00:45
TV-translyasiya:
O‘zaro uchrashuvlar:
81 G‘ALABA 44 DURANG 47 G‘ALABA
So‘nggi uchrashuv: “Yuventus” – “Inter” 1:2 va 1:0
Imkoniyat: 35/30/35
Jamoalarning transfer qiymati:
“Yuventus” – “Inter”
540,30 million yevro VS 300,50 million yevro
O‘yin haqida ikki og‘iz:
O‘tgan turda A Seriyaning “otaxon” jamoasi “Ko‘hna sinyora” (o‘rtacha 28,7 yosh) Skudetto yo‘lida “Napoli” bilan “hisob-kitob” qilgandi. Endilikda “Yuventus” kuchli to‘rtlikdan boshqasini nazariga ilmasligini ta’kidlayotgan Luchano Spalleti boshchiligidagi “Inter”dan uch ochko tortib olish payida bo‘ladi. Turinliklar ustozi Massimiliano Allegri inqiroz ikki yil ilgari kuzatilgan, bugungi kunda ishlar beshligini zo‘r berib isbotlashga urinyapti. Lekin quruq qoshiq og‘iz yirtadi. Mutaxassisning gap-so‘zlari maydonda, turnir jadvalida ham o‘z aksini topishi zarur. Buning uchun “chempionlik poygasi”ga suqilib kirmoqchi bo‘layotgan klublardan “qutulish” talab etiladi. “Neradzurrilar” ham maydonga ochko ulashish maqsadida tushmaydi. Ustiga-ustak, hozircha Luchano Spalletti shakllantirgan “Inter”ni kuragini yerga tekkizadigan mard topilgani yo‘q. Mezbonlar ustozi esa 38 uchrashuvning 36 tasida raqibini yer tishlatgani bilan og‘iz ko‘pirtirishi mumkin.
№1-match: “MANCHESTER YUNAYTED” – “MANCHESTER SITI”
10 dekabr, yakshanba, soat: 21:30
TV-translyasiya: «Futbol TV»
O‘zaro uchrashuvlar:
42 G‘ALABA 47 DURANG 55 G‘ALABA
So‘nggi uchrashuv: “Manchester Siti” – “Manchester Yunayted” 2:1 va 0:0
Imkoniyat: 35/30/35
Jamoalarning transfer qiymati:
“Manchester Siti” – “Manchester Yunayted”
629,50 million yevro VS 592,75 million yevro
O‘yin haqida ikki og‘iz:
“Shaharliklar” boshqaruvi Gvardiolaga topshirildiyu jamoaning boshi rekorddan chiqmayapti. Ularning so‘nggisi – mehmondagi ketma-ket 11 matchda raqiblarini dog‘da qoldirgani bo‘ldi. Shunga qaramay, “Siti” ustozi “ertami kechmi mag‘lubiyatni qabul qilamiz”, deyishdan charchamayapti. Turnir jadvalida “Ko‘klar” yaqqol yetakchi va ikkinchi o‘rinni egallagan “Yunayted” o‘rtasidagi tavofut sakkiz ochkoga yetgan. Lekin Mourinyoni bu tavofut tashvishga solmaydi. Aynan o‘zaro uchrashuvlar, “olti ochko”ga teng matchlarda “hamshaharlari”ning qarshiligini sindirish rejasini tuzib qo‘ygan. E’tiborga molik tomoni, “Mankunianlar” o‘z uyida gard yuqtirmaslikni qoyillatadi. Misol uchun, sakkiz uchrashuvning yettasida maydon egalarining darvozasini ishg‘ol qiladigan raqib topilmadi. Premyer-Lligadagi “intriga”ning “o‘lmasligi” ham Joze Mourinyoga bog‘liq bo‘lyapti. Ya’ni, Joze janoblari o‘zi kabi boshqa hamkasblarini ham ma’lum muddat yengil tin olishlariga imkon hozirlashi mumkin. Xo‘sh, Pep “Siti” rulidagi saksoninchi bahsda “Yunayted”ning kunini ko‘rsatadimi yoki Joze «Arsenal»dan keyin endi «Siti»ning APLdagi ilk mag‘lubiyatni tan olishga majbur qila olarmikan? Yakshanba kuni «Orzular teatri»da ko‘ramiz, kuzatamiz!
Ulug‘bek RAHMONQULOV, «Erudit Sport» gazetasi.
