Kataloniyaning “Barselona” klubi hujumchisi Lionel Messi smartfonlar ishlab chiqaradigan Sirin Labs kompaniyasi bilan shartnoma imzoladi.
Bu haqda kompaniyaning ijtimoiy tarmoqdagi sahifasi xabar berdi.
Xabarda aytilishicha, argentinalik taniqli futbolchi Finney nomli dunyodagi ilk kriptosmartfonni savdoga chiqarishga hozirlik ko‘rayotgan kompaniya elchisiga aylangan.
Ma’lumot o‘rnida, smartfon Android'ga asoslangan Shield OS tizimida ishlaydi.
Tizim yuqori darajada himoyalangan kriptografik yadroga ega va blokcheyn-ilovalar bilan ishlash imkoniyatini beradi.
Sirin Labs kompaniyasiga qozog‘istonlik investor Kenes Rakishev va isroillik tadbirkor Moshe Xegog tomonidan asos solingan.
Shuningdek, mazkur loyihada amerikalik bokschi Floyd Meyvezer ham ishtirok etgandi.
Eslatib o‘tamiz, Lionel Messi yaqinda “Barselona” klubi bilan amaldagi shartnomani uzaytirgani haqida avvalroq xabar bergandik.
