Futbol bo‘yicha Peru terma jamoasi va “Flamengo” klubi hujumchisi Xose Paolo Gerrero JCH-2018 musobaqasida ishtirok eta olmaydi.
Chunki Gerrero FIFA tomonidan bir yillik muddatga diskvalifikasiya qilindi. Bu haqda xalqaro futbol tashkiloti (FIFA) Matbuot xizmati xabar bermoqda.
Futbolchiga bir yil muddat mobaynida terma jamoa va klub futbolchisi sifatida har qaysi rasmiy o‘yinlarda ishtirok etish taqiqlandi.
Ta’kidlab o‘tish joizki, Xose Paolo Gerrero Peru terma jamoasi sardori hisoblanadi.
Ma’lum bo‘lishicha, 33 yoshli futbolchining qonida taqiqlangan kokain moddasi va benzoilekgonin (kokainni qayta ishlash vositasi) topilgan.
Gerreroning qonida doping borligini aniqlash ishlari JCH-2018 saralash boschiqidan o‘rin olgan Argentina terma jamoasiga qarshi uchrashuv (5 oktyabr) dan keyin olib borilgan.
Xose Paolo Gerrero chetlatish muddati 3 noyabr kunidan boshlab kuchga kirgan.
Eslatib o‘tamiz, Peru terma jamoasi qit’alararo saralash bosqichida Yangi Zelandiyani javob uchrashuvida mag‘lubiyatga uchratib, JCH-2018 guruh bosqichiga yo‘l olgandi.
Peruliklar jahon chempionatining “S” guruhida Fransiya, Avstraliya va Daniya terma jamoalariga qarshi bahs olib borishadi.
Ma’lumot o‘rnida, JCH–2018 final bosqichi 2018 yilning 14 iyun kunidan 15 iyul kuniga qadar Rossiyaning 11 shahri: Moskva, Sankt-Peterburg, Kazan, Sochi, Nijniy Novgorod, Samara, Kaliningrad, Yekaterinburg, Saransk, Volgograd va Rostov na-Donudagi 12 ta stadionda bo‘lib o‘tadi.
