Lacaro de la Penya «Valensiya» rasmiy suratkashi hisoblanadi. U 10 yil mobaynida jamoaning yulduzli tarkibini suratga olgan, yevrokuboklar tufayli turli mamlakatlarda bo‘lgan.
U kelganidan so‘ng «Valensiya» 12 nafar murabbiyni almashtirdi. Ayni payt jamoa Ispaniya chempionatida 2-o‘rinni band etib turibdi.
O‘tgan hafta fotosuratchi rossiyalik jurnalistlar bilan suhbatlashib, turli mavzulardagi savollarga javob berdi.
- Sizning eng muhim suratingiz qaysi?
- Bunaqasi yo‘q. Hamisha eng muhimini bugun olaman, deb o‘ylayman. Lekin futbolchilar meni eslagan o‘yinlardagi suratlarimni hech qachon unutmayman.
Gol urib, fotografga o‘girilish juda qiyin. Otamendi «Elche»ga qarshi uchrashuvda golini nishonlayotib meni qidirgan.
Kameramni ko‘rganidan so‘ng qo‘lini boshiga qo‘yib, generalcha ishora qilgandi. O‘sha suratdan so‘ng Nikoni «General» deb atay boshlashgan.
- Qaysi futbolchilar suratga tushishni yaxshi ko‘rishadi?
- Hammalari. Ayniqsa, hozir ijtimoiy tarmoqlar rivojlangan paytda. Hazil aralash rad javobini berishadi. Shunday hazilkashlardan biri - Zaza.
U qo‘llari bilan ob’ektivni to‘sib oladi. Aynan shu tufayli Simone haqidagi eng mashhur suratimni olganman.
- Fransiyada tug‘ilganmisiz?
- Parijda, ispaniyalik emigrantlar oilasida dunyoga kelganman. Lekin o‘zimni haqiqiy asturiyalik deb hisoblayman. Chunki uch yoshimda ota-onam bilan Ispaniya shimoliga ko‘chib o‘tganmiz. Men tug‘ilgunimcha otam dalada ishlagan.
Ispaniyada ish yo‘qligi tufayli sakkiz nafar aka-ukalari bilan Fransiyadan qo‘nim topgan. U yerda uzoq qarindoshlarining kir yuvish xonasi bo‘lgan.
O‘sha paytlari Parijga Ispaniya, Portugaliya va Gresiyadan ko‘pchilik ko‘chib borardi. Shahar o‘tgan davrlar mobaynida sezilarli tarzda o‘zgardi.
- Valensiyaga qanday borib qolgansiz?
- Avvaliga Barselonada fotografiya bo‘yicha o‘qiganman. 2003 yili esa magistraturani o‘qish uchun Valensiyaga bordim. O‘sha zahoti ish topdim: shahar meriyasi uchun suratga olardim.
Keyinchalik sportni suratga olishni boshladim va Marca gazetasiga ishga kirdim. U yerda «Valensiya» vakillari bilan do‘stlashib qoldim.
2007 yili jamoani Kike Sanches Flores boshqarayotgan paytda «ko‘rshapalaklar» fotografsiz qolishdi. Shundan so‘ng meni eslab qolishgan.
- «Valensiya»da ish boshlagunga qadar biror klubga muxlislik qilganmisiz?
- O‘shanda futbolni o‘zgacha qarash bilan tomosha qilardim va menga alohida bir jamoa yoqmasdi. Shunchaki, millionlar o‘yinidan zavq olardim. 2000 yillar boshida «Valensiya»ning barcha o‘yinlarini ko‘rardim.
O‘shanda bu klub juda kuchli edi. Ammo «Real»ning «galaktikos» davri boshlanganida barchasi tugadi. «Ko‘rshapalaklar»ni butun mamlakat yoqtirardi. «Real» va «Barselona»ni hozirgidek yoqtirishlariga esa jurnalistlar sababchi bo‘lishgan.
- Nima uchun?
- Ispaniyada futbolni targ‘ib qilish La-liga va uning jamoalari uchun hurmatsizlik. Jumladan, «Real» va «Barselona»ga nisbatan ham. 95 foiz holatda shu ikki klub haqida gapirishadi.
Jurnalistlarni Ronalduning libosi yoki Pikening shaxsiy hayoti ko‘proq qiziqtiradi. Vaholanki, boshqa jamoalar ham ajoyib o‘yinlar o‘tkazishadi.
Aytaylik, «Valensiya» - «Vilyarreal», «Betis» - «Sevilya» yoki «Eybar» - «Granada» o‘yinlarida shunaqasi kuzatilishi mumkin. Qiziqarli bahslar ko‘p, lekin unga vaqt ajratishmaydi.
Shu bois ham liga rivojlana olmayapti, klublar o‘smayapti hamda «Real» va «Barselona»ga bo‘lgan e’tirozlar kuchaymoqda.
- Siz unuta olmaydigan o‘yin qaysi?
- «Valensiya»ning YECHL finalida «Bavariya»ga qarshi o‘tkazgan uchrashuvi. O‘sha bahsni o‘n nafar notanish yigitlar hamrohligida tomosha qilganman. Oramizda valensiyalik bo‘lmagan. Lekin o‘yin oxirida barchamiz yig‘laganmiz.
- «Valensiya»dagi birinchi mavsumingizni eslay olasizmi?
- O‘shanda 28 yoshda edim. Vilya, Silva, Mata, Visente, Albiol, Baraxa, Angulo, Kanisares, Albelda, Xoakin va Moryentes kabi futbolchilar o‘ynaydigan jamoaga kelgandim
Afsuski, shu tarkib bilan ham jamoa La-ligada zo‘rg‘a «jon» saqlab qolgan.
- Fotograf sifatida «Mestalya»dagi ilk o‘yiningiz qaysi?
- YECHLdan o‘rin olgan «Inter»ga qarshi bahs. Uchrashuv oxirida mushtlashuv yuzaga kelgan. David Navarro Burdissoning burnini sindirgandi. Keyin maydonga «Inter»ning hamma o‘yinchilari chiqqandilar.
- Futbolchilar orasida do‘stlaringiz bormi?
- Mata bilan iliq munosabatdamiz. Xuan juda ziyoli futbolchi. Boshqalarga o‘xshamaydi. Juda ko‘p kitob o‘qiydi. «Tabib: Ibn Sino shogirdi» asarini aynan uning maslahati bilan mutolaa qilganman.
- «Valensiya»ning eng quvnoq futbolchisi kim edi?
- Xoakin. Hattoki, klub yomon o‘ynaganda ham uning yuzidan tabassum arimasdi.
A.ESHONXONOV tayyorladi
