Shu yilning 28 avgust kuni “Alyans Arena” stadionida “Bavariya”ning sobiq a’zosi Bastian Shvaynshtayger uchun xayrlashuv o‘yini tashkil etiladi. Unda futbolchining sobiq va hozirgi klublari — “Bavariya” hamda “Chikago Fayr” jamoalari maydonga tushishadi. Shvaynshtayger ikkala taymda ikkita jamoa sharafini himoya qiladi.

“Men faoliyatimni boshlagan, meni ko‘plab muxlislar qo‘llab-quvvatlab kelgan “Alyans Arena”ga qaytishni sabrsizlik bilan kutyapman”, dedi Shvaynshtayger bu haqda bergan intervyusida.

Ma’lumot uchun, Bastian 13 yoshida “Bavariya” akademiyasiga qabul qilingan. U 17 yil davomida nemis grandi sharafini himoya qildi va jami 22 ta sovringa ega chiqdi. 2015 yilda esa “Bavariya”ni tark etgan.