Bugungi kunda Instagram ijtimoiy tarmog‘i 7 yoshdan 70 yoshgacha bo‘lgan barchani o‘ziga maftun etayotgani sir emas. 2010 yilda ishga tushirilgan xizmat turida “Like”lar bo‘yicha yangi rekord qayd etildi.

Amerikalik model Kayli Jennerning posti Instagram tarixidagi eng ommabop suratga aylandi.

Model 6 fevral kuni tushdan so‘ng 1 fevral kuni dunyoga kelgan qizalog‘ining fotosuratini joylagandi. Bu post joylanganiga 1 sutka to‘lmasidan 14 million “Like” to‘pladi. Kayli Jennerning kuzatuvchilari soni esa 103 millionni tashkil etadi.

20 yoshli Kayli Jenner “Forbes” jurnali tomonidan 30 yoshgacha bo‘lgan eng ko‘p daromad oluvchi mashhur kishilar reytingining kuchli o‘ntaligiga kirishga ham muvaffaq bo‘lgan.

Instagram tarixida eng ko‘p “Like”larga ega bo‘lgan postlarning barchasi aynan farzandlar tug‘ilishi bilan bog‘liq.

Jennerning surati joylanmasidan avval, eng ommabop post futbol bo‘yicha “Real” klubi va Portugaliya termasi a’zosi Krishtianu Ronalduga tegishli edi.

2017 yilning noyabr oyida Krishtianu Ronalduning farzandi dunyoga kelgach, tug‘ruqxonada tushgan fotosurati 11,3 million “Like” to‘plashga erishgan edi.