Futbol taraqqiyoti yo‘lida olib borilayotgan islohotlar ko‘lamini kengaytirish va ularning amalga oshirilishini tezlashtirish, ijtimoiy himoyaga muhtoj oilalarning farzandlarini futbol bilan shug‘ullanishiga keng imkoniyat yaratish maqsadida poytaxtimizdagi “Chig‘atoy” sport bazasida joylashgan Respublika futbol bo‘yicha sport mahoratini oshirish Oliy maktabi qoshida “Yosh futbolchilar” guruhlari faoliyat yuritmoqda.

Ushbu guruhlarda respublikamizning turli viloyatlaridan tashrif buyurgan 2000-2012 yillarda tavallud topgan 150 nafarga yaqin bolalardan iborat jami 9ta guruh mavjud bo‘lib, tajribali mutaxassislar, o‘z vaqtida mashhur futbolchi bo‘lgan Zayniddin Tojiyev, Eldor Magdeev, Hikmat Hoshimov boshchiligida mashg‘ulotlar olib borishmoqda.

Yosh futbolchilar tajribali mutaxassislardan futbol sir-asrorlarini o‘rganish jarayonida nazariy mashg‘ulotlar bilan birga 2ta tabiiy va 1ta sun’iy qoplamali maydonda amaliy mashg‘ulotlar ham o‘tkazishadi.

Mashg‘ulotlar haftasiga uch-to‘rt marta bo‘lib, har haftaning oxirgi kunida guruhlar o‘rtasida nazorat uchrashuvlari o‘tkaziladi.

Shuni ham alohida ta’kidlash kerakki, ushbu guruhlarda ijtimoiy himoyaga muhtoj oilalarning farzandlari futbol bilan bepul shug‘ullanishmoqda.

“Yosh futbolchilar” guruhi tarbiyalanuvchilari futbol bo‘yicha Toshkent shahar Birinchiligida ham muvaffaqiyatli qatnashmoqda.

"Yosh futbolchilar" guruhiga a’zo bo‘lish istagida bo‘lgan bolalar sinov asosida qabul qilinadilar. Murojaat uchun raqamlar: +998 90 954 46 20, +998 90 946 00 79