Bugun Rossiya poytaxtida Xalqaro futbol federasiyalari Assosiasiyasi (FIFA)ning 68-kongressi boshlandi.

Ushbu kongress kun tartibidan o‘rin olgan eng asosiy masala – 2026 yili bo‘lib o‘tadigan jahon chempionati uchun mezbonni aniqlashdan iborat. Moskva shahridagi «Ekspomarkaz»da bo‘lib o‘tayotgan ushbu tadbirda O‘zbekiston Milliy olimpiya qo‘mitasi Prezidenti va O‘zbekiston futbol assosiasiyasi birinchi vise-prezidenti Umid Ahmadjonov, shuningdek, O‘FA bosh kotibi Sardor Rahmatullayevlar ham ishtirok etishmoqda. Shuningdek, Rossiya Federasiyasi Prezidenti Vladimir Putin ham kongressga tashrif buyurdi va chiqish qildi.

Ma’lumot uchun, JCH-2026 bahslariga mezbonlik qilish uchun AQSH-Meksika-Kanada va Marokash mamlakatlari kurash olib borishmoqda. Qayd etib o‘tish lozimki, bungacha xech qachon uchta mamlakatda jahon chempionati o‘tkazilmagan. Mezbonlik uchun nomzodlarni tanlashda Yevropa va Osiyo mamlakatlaridan nomzodlar qabul qilinmagan. Chunki, yaqinda start oladigan Mundial Rossiyada, 2022 yilgi jahon birinchiligi esa Qatarda o‘tkaziladi.

Kongress kun bo‘yi davom etadi. JCH-2026 mezbonini aniqlash kun tartibining 13-masalasi hisoblanadi. Shuningdek, bugun 69-Kongressga Parij shahri mezbonlik qilishi ham rasman e’lon qilinishi ko‘zda tutilgan. Qolaversa, ishtirokchilar JCH-2018ga tayyorgarlik, 2017 yilgi moliyaviy yakunlarga oid masalalarni ham muhokama qilishadi.

Eslatib o‘tamiz, ertaga Moskvadagi «Lujniki» arenasida jahon chempionatining ochilish marosimi bo‘lib o‘tadi. Unda mezbon Rossiya terma jamoasi Saudiya Arabistoniga qarshi maydonga tushadi. Ushbu o‘yinni FIFAga a’zo barcha Kondeferasiyalar rahbarlari qatorida Umid Ahmadjonov ham bevosita stadiondan kuzatib boradi.