Rossiyada davom etayotgan Jahon chempionatida 3-tur o‘yinlari boshlandi. "A" guruhidan o‘rin olgan Rossiya va Urugvay terma jamoalari o‘zaro o‘yinda guruhda 1-o‘rin masalasiga oydinlik kiritishdi.

Mezbonlarga qarshi bahs janubiy amerikaliklar uchun omadli boshlandi. Luis Suares shundoqqina jarima maydonchasi tashqarisidan belgilangan jarima zarbasini golga aylantirishga muvaffaq bo‘ldi. Oradan 13 daqiqa o‘tib, yana jarima maydonchasi tashqarisidan — bu safar o‘yindan yo‘llangan zarba rekoshet orqali raqib darvozasidan o‘rin oldi.

Uchrashuvning 36-daqiqasida Igor Smolnikov uchrashuvda ikkinchi sariq kartochkani olib maydonni tark etdi. Bu esa Cherchesov shogirdlarining yumushini yanada og‘irlashtirdi.

O‘yinning eng so‘nggi daqiqasida Edinson Kavani Rossiya darvozasini yana bir marta ishg‘ol etib, hisobni yirik ko‘rinishga keltirib qo‘ydi. Shu tariqa, Urugvay terma jamoasi "A" guruhida 1-o‘rinni egallagan bo‘lsa, mezbonlar 2-o‘rin bilan pley-offga chiqishdi. Ularning nimchorak finaldagi raqiblari nomi bugun tunda bo‘lib o‘tadigan "V" guruhi bahslaridan keyin aniq bo‘ladi.

JCH-2018, "A" guruhi, 3-tur
Urugvay – Rossiya 3:0 (2:0, 1:0)
Gollar: 1:0 – 10 Suares, 2:0 – 23, avtogol Cherishev, 3:0 – 90 Kavani.
Urugvay – Muslera, Kaseres, Koates, Godin, Vesino, Nandes (Rodriges, 73), Torreyra, Laksalt, Bentankur (de Arraskaeta, 63), Kavani (Maksi Gomes, 90), Suares.
Rossiya – Akinfeev, Kutepov, Kudryashov, Smolnikov, Ignashevich, Zobnin, Gazinskiy (Kuzyayev, 46), Miranchuk (Smolov, 60), Samedov, Cherishev (Fernandes, 38), Dzyuba.
Ogohlantirishlar: Gazinskiy (9), Smolnikov (28), Bentankur (59).
Chetlatish: Smolnikov (36).