23 oktyabr kuni klublar o‘rtasidagi Osiyo chempionlar ligasining yarim finali doirasida Eronning Persepolis va Qatarning Al-Sadd jamoalari o‘rtasida uchrashuv bo‘lib o‘tdi.

Mazkur bahsda durang (1-1) natija qayd etilib, ikki o‘yin natijasiga ko‘ra, Xavi sardorligidagi Qatar klubi musobaqani yarim finaldayoq tark etdi.

Mazkur jamoalar o‘rtasidagi ilk uchrashuvda 1-0 hisobi qayd etilib, Texron klubining qo‘li baland kelgan edi.

24 oktyabr kuni Suvon Blyuuings (J.Koreya) va Kashima Antlers (YAponiya) o‘rtasida ikkinchi yarim finalning javob o‘yini bo‘lib o‘tadi. Ular o‘rtasidagi birinchi uchrashuvda yaponiyaliklar o‘z maydonida zafar (3-2) qozongandi.

Osiyo chempionlar ligasi nomi bilan 16-marotaba tashkil etilayotgan klublar o‘rtasidagi musobaqaning hal qiluvchi uchrashuvi 10 noyabrga belgilangan. Musobaqada g‘olib bo‘lgan klub kelasi yil klublar o‘rtasida o‘tkaziladigan jahon chempionatiga yo‘llanmani qo‘lga kiritadi.