Superliga-2019 ga tayyorgarlik ko‘rayotgan "Bunyodkor" bugun akademiya maydonida "Oqtepa"ga qarshi o‘yin o‘tkazdi.

Ushbu o‘yinda jamoa bosh murabbiyi Vadim Abramov o‘rinbosarlar tarkibini sinovdan o‘tkazish hamda asosiy jamoaga nomzod futbolchilarning haraktlarini kuzatishga qaror qildi va asosiy tarkib a’zolariga dam berdi.

Teng kurashlar ostida o‘tgan o‘yinda dastlab "Oqtepa" futbolchilari 29-daqiqada jarima zarbasidan hisobni ochishdi.

Ikkinchi bo‘limni "qaldirg‘ochlar" tezkor gol bilan boshlashdi. 48-daqiqada Doniyor Abdumannopov javob to‘pini kiritdi.

Hisob tenglashgach ikkala jamoa ham navbati bilan hujumlarga zo‘r berdi. 68-daqiqada raqib futbolchisini o‘z jarima maydonchasida Kemran Najafaliyev qo‘pollik bilan to‘xtatib qoldi va hakam penalti belgiladi. "Oqtepa" a’zosi Sarvar Karimov penaltini aniq amalga oshirdi.
Shundan so‘ng darvozalarga boshqa to‘p kiritilmadi va "qaldirg‘ochlar" o‘rtoqlik o‘yinida "Oqtepa"ga mag‘lub bo‘lishdi.

NAZORAT UCHRASHUVI

"BUNYODKOR" - "OQTEPA" 1-2

Gollar: Irisdavlat Safarov (29'), Sarvar Karimov (68') - Doniyor Abdumannopov (48')