Belgiyalik futbolchining «Real Madrid» safiga borib qo‘shilishi tobora aniqlashib bormoqda. Futbolchining o‘rnini bosa oladigan futbolchi qidirishni boshlab yuborishdi. «Goal 24» nashri Azarning o‘rnini egalash ehtimoli yuqori bo‘lgan futbolchilar ro‘yxatini e’lon qildi. Bugun aynan shunday futbolchilar to‘g‘risida so‘z boradi.

Vilfid Zaha

«Billur mehmonhona» deya yuritiladigan jamoaning o‘yinini so‘nggi yillarda sezilarli darajada kuchaytirgan futbolchi ayni damda grand klubga o‘tishga har doimgidanda tayyor. Uning kariyerasi o‘zining pik nuqtasiga yaqinlashib kelmoqda. Zaha ikkala qanotda ham birdek kuchli o‘yin ko‘rsata oladi. Futbolchi ayniqsa, so‘nggi 2 mavsumni ajoyib o‘tkamoqda va uning o‘zi ham kuchli klubga o‘tish istagida.

Antoni Marsial

«Manchester Yunayted» safiga kelib qo‘shilgandan beri futbolchini omadsizliklar quvib yuribdi. U goh zahirida qolib ketsa, gohida jarohatlar girdobiga tushib qolmoqda. Sulsher jamoa postiga kelgach, vaziyat o‘zgarishi kutilgandi, ammo  yana ayrim muammolar sababli Marsial asosiy tarkibdan joy ola bilmayapti. Futbolchining o‘zi ham boshqa klub safiga o‘tishga qarshi emas, chunki uni «Manchester Yunayted» o‘tgan mavsumda 90 million evaziga sotmoqchi ekanligini e’lon qilgan edi.
«Manchester Yunayted» Sulsherning  falsafasiga mos tushadigan futbolchilarni keyingi mavsumda harid qilishga urunib ko‘radi. Marsial esa keyingi mavsumda ham asosiy tarkibda maydonga tushishi so‘roq ostida turgan jamoada qolishdan ko‘ra «Chelsi»ga o‘tib ketsa, ajab emas. Azarning pozisiyasi Marsialniki bilan bir hil ekanligini hisobga olsak, fransuz «Chelsi»ga tezda moslashib ketishi aniq.

Beyl

Uelslik futbolchi uchun APL o‘z uyidek gap. Zidan ochiqchasiga Beylning kelajakdagi rejalarida yo‘q ekanligini aytgach, futbolchining agenti hozirda bir nechta klublarga mijozini tavsiya qilmoqda. Bu jamoalar orasida «Chelsi» ham mavjud.
«Chelsi» Beyl transferi orqali o‘z imidjini ushlab qolishning uddasidan chiqadi. Uelslik futbolchining yoshi biroz o‘tgan bo‘lsada, uning darajasi baland. U Madridda hamma sovrinlarni qo‘lga kiritib bo‘ldi. Bundan tashqari «Real Madrid» yangi shartnoma taklif qilgan taqdirda ham maosho oldingidan anchagina kichikroq summani tashkil etishi aniq. «Chelsi» esa futbolchiga kattagina maosh belgilangan shartnoma taklif qilishga qurbi yetadigan klub. Shunday ekan, ikki tomon ham bu kelishuvdan yaxshigina manfaatdor bo‘ladi.

Irving Losano

Bu futbolchi Rossiya yashil maydonlarida o‘tgan JCH da Meksika termasi safida Germaniya  darvozasiga g‘alaba to‘pini kiritgani bilan ko‘pchilkning yodida qolgan. Hozirda Gollandiyaning «PSV» klubi sharafini himoya qilayotgan futbolchi ajoyib o‘yinlari bilan ko‘plab grandlar e’tibor markazida turibdi. Futbolchiga shunindek «Yuventus» va «Arsenal» ham katta qiziqish bildirmoqda. Eng qizig‘i shundaki, Losanoning o‘yin uslubi Azarniki bilan bir hil. U ikkala qanotda ham, hujumchi ortida ham, xatto markaziy hujumchi pozisiyasida ham o‘ynay oladi. Bu Edenning o‘rnini to‘liq bosa oladi degani. Bundan tashqari, anchagina yosh bo‘lgan futbolchi «Chelsi» tarkibida yildan-yilga o‘z o‘yinini kuchaytirib bora oladigan darajda iqtidorli.

Eden Azar ketadigan bo‘lsa, uning o‘rnini darrov to‘ldirish talab etiladi. Aks xolda, Ronaldu va «Real Madrid» voqeasi takrorlanishi mumkin. To‘g‘ri, klub muxlislari Pulishich Azarning o‘rnini egallashidan umidvor bo‘lmoqda. Pulishichning iqtidoriga shubhamiz yo‘q, ammo APL da jamoani yelkasida ko‘tarib yurish uchun u xali biroz yoshlik qiladi.