Urganch ixtisoslashtirilgan olimpiya zaxiralari maktab-internatida stol tennisi bo‘yicha ayollar va erkaklar o‘rtasida O‘zbekiston kubogi musobaqasi bo‘lib o‘tdi.
Unda mamlakatimizning turli hududlaridan tashrif buyurgan 13 ta jamoa vakillari bahs yuritdi. Deyarli bir hafta davom etgan bellashuvlarning yakuniy natijasiga ko‘ra, ayollar o‘rtasida Toshkent shahri jamoasi birinchi o‘rinni egalladi. Ikkinchi o‘rin Toshkent viloyatining stol tennisi ustalariga nasib etdi. Shohsupaning uchinchi pog‘onasiga Xorazm va Andijon viloyati jamoalari ko‘tarilishdi.
Erkaklar orasida kechgan musobaqada Toshkent viloyati sportchilariga munosib raqib topilmadi. Natijada, ushbu viloyat vakillari Kubok sohibiga aylanishdi. Andijon viloyati terma jamoasi ikkinchi o‘ringa sazovor bo‘ldi. Qoraqalpog‘iston Respublikasi va Toshkent shahri jamoalari mos ravishda uchinchi o‘rindan joy olishdi.
Musobaqa ishtirokchisi, Xorazm viloyati terma jamoasi a’zosi Fotima HAYITBOYEVA shunday dedi: – “Stol tennisi bilan 7 yoshimdan shug‘ullanaman. Ustozim Mardona Aitovadan nafaqat, mazkur sport turining sir-asrorlarini o‘rgandim, qolaversa, uning yordamida katta yutuqlarga ham erishdim. Vaholanki, shu paytgacha turli yosh toifasida besh marta O‘zbekiston chempioni bo‘ldim. O‘zbekiston terma jamoasi safida Qozog‘iston va Malayziya davlatlarida uyushtirilgan Osiyo chempionatida qatnashdim. Buning barobarida, Moldova va Latviya mamlakatlarida uyushtirilgan nufuzli xalqaro turnirlarda ishtirok etib, g‘olib va sovrindor bo‘ldim. Urganchda uyushtirilgan O‘zbekiston kubogida dugonalarim bilan bronza medalini qo‘lga kiritdik. Bundan juda xursandmiz. Ayni damda, Urganch davlat universitetining 2-bosqichida tahsil olyapman. Nasib qilsa, oliygohni tamomlab ustozimdan olgan tajribamni yoshlarga o‘rgatish maqsadim bor.”