Kecha butun dunyoni hayratda qoldirgan uchrashuv haqidagi qizg‘in fikrlar to‘xtaganicha yo‘q. Hamma o‘z fikrlari bilan o‘rtoqlashmoqda. Bugun e’tiboringizga kechagi uchrashuvdan so‘ng «Barselona» futbolchilari tomonidan «Mundo Deportivo» nashriga berilgan intervyularni taqdim etamiz.

Sehio Buskets

Bugun ularning pressinglariga dosh bera olmadik. Ayniqsa, birinchi goldan so‘ng  ular bizga bosimni yanada oshirishdi. Biz o‘z muxlislarimizdan uzr so‘rashdan boshqa chora topa olmayapmiz. Bunday voqea «Roma»ga qarshi bahsda ham kuzatilgan edi.  Birinchi uchrashuvdagi g‘alabadan so‘ng mag‘lubiyatga uchrash juda alamli. Biz «Enfild»da uchrashuv oson kechmasligini bilgan edik. Afsuski vaziyatlarimizdan foydalana olmadik. Raqib esa, bizdan har tomonlama ustunlik qildi.  Ular hal qiluvchi ikkita futbolchisiz bizni qanday mag‘lubiyatga uchratganiga tushuna olmayapman. Bugun ular finalga chiqishni bizdan ko‘ra ko‘proq xohlashdi va buni uddasidan chiqishdi.

Luis Suarez

To‘g‘risi nima deyishni ham bilmayapman. Biz «Kamp Nou»da ajoyib o‘yin ko‘rsatdik. Raqib ustidan yirik hisobda g‘alaba qozondik va bu uchrashuvda ham voqea takrorlanishi shart edi. Afsuski, alamli mag‘lubiyatga uchradik. Men bugun biz mag‘lubiyatga noloyiq edik deb hisoblayman. Fabino bugun juda qo‘pol o‘ynadi. Hakam unga qizil kartochka berishi shart edi! Agar, VARdan foydalanilganda bu voqealarning hammasi bizning foydamizga hal bo‘lar edi. «Liverpul» g‘alabaga haqli futbol ko‘rsatmadi, ular juda qo‘pol to‘p surishdi.