Mudofaa vazirligi sport klubida armiya qo‘l jangi bo‘yicha Ochiq saralash musobaqasi bo‘lib o‘tdi.   Unda barcha harbiy okruglar, Havo hujumidan mudofaa va Harbiy havo kuchlari hamda Toifalangan ob’ektlarni qo‘riqlash qo‘shinlari qo‘mondonliklari, shuningdek, respublikamizdagi oliy harbiy ta’lim muassasalaridan jami 138 nafar harbiy sportchi 13ta jamoa tarkibida o‘zaro bellashdi. Bu haqda Mudofaa vazirligi matbuot xizmati O‘zAga ma’lum qildi.   Yakuniy natijalarga ko‘ra, Toshkent harbiy okrugi jamoasi 1-o‘rinni egallagan bo‘lsa, 2-o‘rin Markaziy harbiy okrug sportchilariga nasib etdi. Janubi-g‘arbiy maxsus harbiy okrug jamoasi esa 3-o‘ringa sazovor bo‘ldi.     Musobaqa g‘oliblari:   • Ramazon Temirov — Toshkent harbiy okrugi (-60 kg); • Elyor G‘ofurov — Toshkent harbiy okrugi (-65 kg); • Behruz Akbarov — Toshkent harbiy okrugi (-70 kg); • Husniddin Mamajonov — Markaziy harbiy okrug (-80 kg); • Bekzod Nurmatov — Qurolli Kuchlar akademiyasi kursanti (-85 kg); • Sherali Muhammadaminov — Toshkent harbiy okrugi (-90 kg); • Ulug‘bek Karimov — Markaziy harbiy okrug (+90 kg).   Musobaqa g‘oliblari diplom va qimmatbaho sovg‘alar bilan taqdirlanib, MDHga a’zo mamlakatlar do‘stona armiyalarining spartakiadasi doirasida o‘tkaziladigan armiya qo‘l jangi bo‘yicha chempionatga yo‘llanmani qo‘lga kiritdi.   Ta’kidlash kerak, o‘tgan yilning sentyabr oyida Hamdo‘stlikka a’zo davlatlar do‘stona armiyalarining spartakiadasi doirasida Toshkentda o‘tkazilgan armiya qo‘l jangi chempionatida O‘zbekiston Mudofaa vazirligi harbiylari umumjamoa hisobida 1-o‘rinni qo‘lga kiritgan edi. Bu yilgi xalqaro darajadagi musobaqa Qozog‘istonda o‘tkazilishi kutilmoqda.