Janubiy Koreya Key-ligasining 17-turi doirasida "Seul" safarda "Tegu" klubi mehmoni bo‘ldi.

Musobaqa jadvalida 4-o‘rinni egallab turgan teguliklar butun o‘yin davomida hujumkor o‘yin namoyish qilishdi. Biroq seulliklar posboni bir necha marta seyv namoyish qilib, jamoasining muvafaqiyatiga salmoqli hissa qo‘shdi.

Uchrashuvning 35-daqiqasida Ikrom Aliboyev 25 metrlardan kuchli zarba berib, "Seul"ni hisobda oldinga olib chiqqan bo‘lsa, oradan 6 daqiqa o‘tib mehmonlar burchak to‘pidan samarali foydalanishdi va hisobdagi farqni oshirishdi.

Ikkinchi bo‘lim boshida mezbonlar farqni bittaga qisqartirishdi. Qolgan daqiqalarda "Tegu" futbolchilari ikki marta darvoza to‘sinini nishonga olishgan bo‘lsa, mehmonlarning bir hujumi paytida to‘p darvoza ustunidan maydonni tark etdi.

Shu tariqa, "Seul" qiyin g‘alabani qo‘lga kiritdi va o‘z ochkolarini 37taga yetkazib, jadvalda 1-o‘ringa ko‘tarilib oldi. Ulardan 1 ochko kam jamg‘argan "Chonbuk Motors" va "Ulsan" jamoalari bitta kam o‘yin o‘tkazgan holda 2 va 3-o‘rinlarni egallab turishibdi.

Ikrom Aliboyev bugungi uchrashuvda to‘liq harakat qildi.