Futbol olamida transferlarning o‘rni beqiyos. Futbolchilar yangi klubga o‘tgach, klubda iloji boricha uzoqroq qolishga urunadilar. «Tanganing ikki tomoni bor» deganlaridek, ayrim futbolchilar borki, qisqa muddat ichida bir necha bor o‘z klubini o‘zgartirishlariga to‘g‘ri kelgan. Bugun futbolda kam uchraydigan ana shunday voqealar  qurbonlari haqida so‘z boradi.

Martin Demichelis

Argentinalik himoyachi 2013-yilning yozida «Malaga» dan  «Atletiko Madrid» klubi safiga o‘tadi. Eng qizig‘I shundaki, Martin «matraschilar» safida birorta uchrashuvda maydonga tushmaydi. O‘sha yilning 1-sentabr sanasida Angiliyaning «Manchester Siti» klubiga o‘tib ketadi. Bu transfer uning kariyerasidagi eng omadli qarorlardan biri bo‘ldi. Sababi, u ikki bor APL chempioni va bir necha bor kubok sohibiga aylanadi.

Futbolchi bilan «Malaga»da birga ishagan Manuel Pellegrini uni «shaharliklar» safiga chorlaydi va futbolchi bu chaqiruvni qabul qiladi. Voqealarning rivoji bunday ko‘rinish olishidan «Atletiko Madrid» ham manfaatdor bo‘ladi va futbolchini sotish ortidan 5 million yevro ishlab oladi.  Shunday qilib Martin Demichelis «Atletiko Madrid»ning 51 kunlik futbolchisi sifatida tarixda qoldi.

Roberto Ayyala

«Valensiya» klubi safidagi ajoyib o‘yinlari bilan ko‘plab muxlislarning e’tiborini qozongan himoyachi 21-asr boshida dunyoning eng kuchli himoyachilardan biri edi. «Valensiya» safida 2 bor «La Liga»da g‘alaba qozongan futbolchi 2007-yilda «ko‘rshapalaklar» bilan shartnoma borasida kelisha olmaydi va «Vilyareal» klubi safiga erkin agent sifatida borib qo‘shiladi. Afasuski, u yangi jamoasida birorta uchrashuvda maydonga tushmaydi va iyun oyida Ispaniyaning boshqa bir klubi «Saragosa» tarkibiga 6 million yevro evaziga o‘tib ketadi.
Eng achinarlisi shundaki, bu transfer himoyachining hayotida qora kunlarning boshlanishiga sabab bo‘ladi. Qahramonimiz 45 kungina to‘p surgan «Vilyareal» chempionatda kumush medalga ega chiqqan bo‘lsa, «Saragosa» 18-o‘rin bilan pastki ligaga tushib ketadi.

Aleksandr Kokorin

Moskvaning «Dinamo» klubi hujumchisi Aleksandr Kokorin 2013-yilning  10-iyul sanasida  Rossiyaning «Anji» klubi safiga o‘sha davr uchun rekord summa 19 million yevro evaziga borib qo‘shiladi.
«Anji» klubi egasi sanaladigan Sulaymon Karimov tomonidan harid qilingan futbolchi ham birorta uchrashuvda maydonga tusha olmaydi. Gap shundaki, maydondagi qo‘pol harakati uchun futboldan bir necha oyga chetlatilgan futbolchi yangi klubi safidagi ilk mashg‘ulotlaridayoq kichik jarohat oladi va klubi uchun birorta uchrashuvda maydonga tusha olmaydi. Oradan 37 kun o‘tib 16-avgust sanasida esa, Sulaymon Karimovning rejalari o‘zgaradi va u  katta maosh oluvchi futbolchilarni birin-ketin sotib yuborishni boshlaydi. Qahramonimiz ham aynan o‘sha sanada sobiq jamoasi tomonidan qayta xarid qilinadi. Albatta, sotilgan summasidan anchagina kattaroq narx evaziga.

Hakan Yakin

Shvetsariyaning «Bazel» klubi hujumchisi Hakan Yakin 1,6 million yevro evaziga «PSJ» klubiga o‘tadi. U yangi jamoasida Ronaldinoning o‘rnini bosishi talab etilgan edi. Afsuski, «PSJ» klubi futbolchini tibbiy ko‘rikdan o‘tkazish chog‘ida jarohat bor ekanligini qayd etadi va futbolchi jarrohlik stoliga jo‘natiladi. Bu voqea «PSJ» klubining g‘azabini qo‘zg‘atadi. Gap shundaki, futbolchi jarrohlik stolidan chiqqach, bir necha oy mobaynida futboldan chetda qolishi talab etilar edi. Bunday futbolchini o‘z tarkibida ko‘rishni istamgan «PSJ» futbolchi bilan shartnomani bekor qiladi va o‘z pullarini ortga qaytarib oladi. Yakin esa 30 kun davomida «PSJ» futbolchisi sifatida ommaga tanishtirligan bo‘lsada, ortga qaytishga majbur bo‘ladi.

Kristian Viyeri

O‘z faoliyati davomida 14 bor klubini o‘zgartirgan qahramonimiz faqatgina «Inter» klubidagina bir mavsumdan ortiqroq to‘p surgani bilan ko‘pchilikning yodida qilgan bo‘lsa, ajab emas. 2006-yilda futbolchi «Monako» safiga borib qo‘shiladi. Fransiyada yarim mavsum to‘p surgan futbolchi erkin agent sifatida «Sampdoria» klubiga o‘tib ketadi. Afsuski, Kristian  yangi jamoasida ilk mashg‘ulot kuniyoq janjal ko‘taradi va futbolchilarni dangasalikda ayblaydi. Oradan 30 kun o‘tib u Italiyaning boshqa bir klubi «Atalanta» safiga borib qo‘shiladi. U yangi  jamoasi bilan bir mavsum uchun shartnoma imzolgan bo‘lsada, atigi 7 ta uchrashuvda maydonga tushadi va 2 bor raqiblari darvozasini ishg‘ol qiladi.