Coca Cola Superliganing 15-turidan o‘rin olgan «Bunyodkor» - «Surxon» (3:0) uchrashuvidan keyin o‘tkazilgan matbuot anjumanining birinchi qismida mehmonlar ustozi Vladimir Andreev ishtirok etdi.
- Birinchi navbatda aytishim kerak, bugun kurashlarda, to‘p bilan yurishda «Bunyodkor»ga yutqazdik. Aynan to‘p bilan harakat qilish bo‘yicha mezbonlar bizga nisbatan ustunlik qilishdi. Mana ikkinchi uchrashuvki, aynan shu jihat bo‘yicha raqibga imkoniyatni boy beryapmiz. Funksional holat yaxshi bo‘lmaganida nimadir qilish haqida gapirish noo‘rin.
Birinchi golni keraksiz joyda yo‘l qo‘ygan xatomiz sababli o‘tkazib yubordik. Vaholanki, o‘sha vaziyatda xato qilishga haqqimiz yo‘q edi. O‘ylaymanki, chempionatning qolgan qismida biz uchun hammasi yaxshi bo‘ladi. Biz futbolchilarimizga ishonamiz, vaziyatni o‘nglash yigitlarning qo‘lidan keladi. Umid qilamiz va ishonamiz.
Ochig‘ini aytish kerak, bugun ikkinchi raqamli jamoa bo‘lib o‘ynashni niyat qilgandik. Ammo gol o‘tkazib yubordik. Ikkinchi bo‘limda hammasini boshidan boshlab, vaziyatni o‘nglamoqchi edik, lekin yana ikki bor jazolandik.
