Rossiya chempionatining 7-turi doirasida «Rostov» o‘z uyida «Rubin»ni qabul qilib, irodali g‘alabani qo‘lga kiritdi.

Bahsning 15-daqiqasida qozonliklar Yevgeniy Markovning goli evaziga hisobni ochishdi. Uchrashuvning 29-daqiqasida esa Shomurodov hisobni tenglashtirishga muvaffaq bo‘ldi. Eldor maydon markazida bir raqibni aldab, jarima maydoni tomon yaqinlashib keldi va zarba berdi. To‘p rekoshet holatida "Rubin" darvozasidan o‘rin oldi.

Ikkinchi bo‘limda Shomurodovda gol urish uchun yana bir imkoniyat yuzaga keldi. Uning zarbasidan keyin to‘sin ostiga kirayotgan to‘pni mehmonlar posboni darvoza ustidan chiqarib yubordi. O‘yin tugashiga 3 daqiqa qolganida Saplinov bosh bilan yaqin masofadan darvozani ishg‘ol qilib, rostovliklarga g‘alaba keltirdi.

Shomurodov o‘yinning boshidan oxirigacha maydonda harakat qildi. U qo‘shib berilgan daqiqalarda sariq kartochka olishga ham ulgurdi.

Ushbu g‘alabadan keyin "Rostov" o‘z ochkolarini 14taga yetkazib oldi. Shuningdek, yana 4ta jamoa shuncha ochko bilan jadvalda 1-5-o‘rinlarni bo‘lishib turishibdi.

Rossiya premyer-ligasi, 7-tur
Rostov – Rubin 2:1 (1:1, 1:0)
Gollar: 0:1 – 15 Markov, 1:1 – 29 Shomurodov, 2:1 – 87 Saplinov.
Rostov – Baburin, Chernov, Kozlov, Chistyakov, Sigurdsson, Yeremenko, Saplinov (Dolgov, 90), Glebov (Zuyev, 76), Ionov (Logashov, 90), Normann, Eldor Shomurodov.
Rubin – Dyupin, Pliyev, Danchenko, Sorokin, Stepanov, Bashkirov (Zakirov, 88), Podberezkin (Kvarasxeliya, 44), Konovalov, Davitashvili, Mikeltadze (Makarov, 89), Markov.
Ogohlantirish: Eldor Shomurodov (90).