"Pari Sen-Jermen" klubining 5ta o‘yindan iborat g‘alabalar seriyasi uzilib qoldi. Parijliklar Fransiya chempionatining 7-turi doirasida o‘z uyida "Reyms"ni qabul qilib, imkoniyatni boy berishdi.

Mezbonlar o‘yin boshida 2ta xavfli hujum tashkil qilishdi, ammo vaziyatlardan foydalana olishmadi. Mehmonlar esa 29-daqiqada Kamara tomonidan urilgan gol evaziga hisobni ochishdi. Tuxel shogirdlari o‘yin davomida tashabbusni o‘z qo‘llarida ushlab turgan bo‘lsalar-da, ikkinchi bo‘limda eng xavfli vaziyatni "Reyms" futbolchilari yuzaga keltirishdi. Uden tomonidan yo‘llangan zarba natijasida to‘p ustunga tegib qaytdi.

Qo‘shib berilgan daqiqalarda esa Boulaye Dia "PSJ" darvozasiga ikkinchi to‘pni joylab, o‘yin taqdirini hal qildi.

"PSJ"ning qoqilishidan foydalangan "Anje" ushbu turda g‘alaba qozonib, o‘z ochkolarini 15taga yetkazib, parijliklar bilan birga qo‘shpeshqadamga aylandi.

Fransiya chempionati, 7-tur
PSJ – Reyms 0:2 (0:1, 0:1)
Gollar: 0:1 – 29 Kamara, 0:2 – 90 Dia.
PSJ – Navas, Mbe So (MenYE, 59), Diallo, Kimpembe, Kurzava (Markinyos, 66), Errera, Paredes, Bernat, Sarabiya, Shupo-Moting (Di Mariya, 42), Neymar.
Reyms – Raykovich, Foke, Disasi, Abdelxamid, Konan, Kafaro, Shavaleren, Munesi, Kamara (Dumbiya, 85), Mbuku (Dia, 61), Donis (Uden, 69).
Ogohlantirishlar: Donis (40), Bernat (45), Raykovich (83).