Jahon chempionati saralash bosqichi doirasida Vadim Abramov boshchiligidagi O‘zbekiston terma jamoasi ikkinchi g‘alabani qo‘lga kiritdi. Bu safar jamoamiz Singapurni mag‘lub etdi.

Birinchi bo‘lim
Yamanga qarshi o‘yin bilan solishtirganda, Abramov asosiy tarkibda bitta o‘zgarishni amalga oshirdi: Iskanderov o‘rniga bu safar Odil Ahmedov maydonga tushirildi.

Aynan jamoamiz sardori bahsning 15-daqiqasida hisobni ochishga muvaffaq bo‘lishdi. Qodirqulov faol harakatlari orqali raqib jarima maydoniga kirmoqchi bo‘lganida, himoyachi uni yiqitdi. Belgilangan jarima zarbasini Odil shunday amalga oshirdiki, Qatar (o‘rtoqlik o‘yini) va Ummon (Osiyo kubogi-2019) darvozalariga bo‘lgani kabi olis burchakdan o‘rin oldi.

Shundan so‘ng Singapur hujumga o‘ta boshlashi oqibatida vakillarimizda qarshi hujumda imkoniyatlar yuzaga kela boshladi. Uchrashuvning 33-daqiqasida Alijonovning uzatmasidan keyin Shomurodov darvoza tomon zarba berdi. To‘p esa ustun yonidan o‘tib ketdi. Oradan ko‘p o‘tmasdan yana Alijonov o‘ng qanotdan chiroyli uzatma bilan to‘pni Hamdamovning boshiga "qo‘ndirdi", ammo Dostonning zarbasidan keyin to‘p to‘sin ustidan o‘tib ketdi.

Aynan bosh bilan zarba berishda mezbonlar aniq harakat qilishdi. Bo‘limga qo‘shib berilgan daqiqalarda baland bo‘yli Ixsan Fandi qanotdan yetkazilgan uzatmani darvozaga joylab qo‘ydi. Eldor Suyunov to‘pga tashlandi, ammo uni qaytara olmadi.

Shu tariqa, birinchi bo‘limdan so‘ng kamida 2ta to‘p farqi bilan oldinda borishi kerak bo‘lgan O‘zbekiston terma jamoasi tanaffusga durang bilan yo‘l oldi.

Ikkinchi bo‘lim
Ikkinchi taymning debyuti terma jamoamiz uchun muvaffiyatli chiqdi. Sayfiyev chap qanotdan ajoyib uzatma berdi va Shomurodov himoyachilardan ildamroq harakat qilib, baland sakragancha darvozani ishg‘ol qildi. Eldor ko‘p o‘tmay o‘z dublini rasmiylashtirishi mumkin edi. Uchrashuvning 69-daqiqasida "Rostov" futbolchisi darvozabon bilan yakkama-yakka vaziyatga chiqib, kuchli zarba berdi. To‘p esa to‘singa tegib qaytdi.

Shunga qaramay, Shomurodov o‘z hisobiga ikkinchi golni yozdi. Zaxiradan maydonga maydonga tushgan Ikrom Aliboyev terma jamoamizning qarshi hujumi paytida aniq uzatma bilan Eldorni yakkama-yakka vaziyatga chiqarib yubordi. Hujumchi esa darvozabonni aldab o‘tib, darvozani ishg‘ol qildi.

Shu tariqa, O‘zbekiston terma jamoasiz o‘z ochkolarini 6taga yetkazib, "D" guruhida peshqadamga aylandi.

JCH-2022 saralash. "D" guruhi, 4-tur
Singapur, Singapore Sports Hub Stadium. 16:45
SINGAPUR - O‘ZBEKISTON 1:3 (1:1)
Gollar: Ixsan Fandi (45+1) — Odil Ahmedov (15), Eldor Shomurodov (51, 90+2)
Ogohlantirishlar: Shaval Anvar (31) — Jaloliddin Masharipov (57)
Singapur: 01.Izvan bin Mahbud, 08.SHahdan Sulaymon, 09.Ixsan Fandi (Gabriyel Kuak 69), 11.Muhammad bin Ahmad, 13.Hafiz Nor, 14.Hariss Harun (S), 16.Hami Syahin, 17.Irfan Fandi Ahmad, 20.SHaval Anvar, 21.Safuvan bin Baharuddin, 23.Zulfahmi bin Arifin (Irvan Shah Arismayl 81)
O‘zbekiston: 01.Eldor Suyunov, 04.Farrux Sayfiyev, 05.Rustam Ashurmatov, 20.Islom To‘xtaxo‘jayev, 03.Hojiakbar Alijonov, 13.Sanjar Qodirqulov, 09.Odil Ahmedov (S), 10.Jaloliddin Masharipov (Sardor Mirzayev 70), 07.Otabek Shukurov (Ikrom Aliboyev 52), 17.Doston Hamdamov (Igor Sergeev 90+2), 14.Eldor Shomurodov.