Yaponiyaning Osaka shahrida dzyudo bo‘yicha katta dubulg‘a tasnifiga kiruvchi musobaqa o‘z yakuniga yetdi. Tokio Olimpiadasi yo‘lida qimmatli reyting ochkolarini taqdim qiladigan mazkur musobaqada vakillarimiz ham munosib ishtirok etishdi. Jumladan, bugun bo‘lib o‘tgan og‘ir vaznli polvonlari bahsida hamyurtlarimiz 1 tadan kumush va bronza medallariga sazovor bo‘ldilar.

-90 kilogramm vazn toifasida kumush medalni qo‘lga kiritgan Davlat Bobonov Olimpiada reytingi uchun 700 reyting ochkosiga ham ega bo‘ldi. Bobonov final yo‘lida 2015 yilgi jahon chempioni janubiy koreyalik Dongxan Gvak, amaldagi chempion gollandiyalik Noel Vent End kabi dzyudochilarni mag‘lub etishning uddasidan chiqdi. Afsuski, vakilimiz oltin medal uchun kechgan kurashda gruziyalik Beka Gviniashviliga imkoniyatni boy berib qo‘ydi.

+100 kilogramm vazn toifasida Alisher Yusupov shohsupaning uchinchi pog‘onasiga ko‘tarildi. Yusupov bronza medali uchun kurashda musobaqa mezbonlaridan biri Daigo Kagavadan ustun keldi. Ta’kidlash joiz, bu Bobonov va Yusupov uchun faoliyatida katta dubulg‘a turkumiga kiruvchi musobaqalardagi dastlabki medal bo‘ldi.

Afsuski, boshqa bir vakilimiz Muhammadkarim Hurramov (-100 kg) bronza medali uchun kurashish bosqichida yaponiyalik Kentaro Iidaga mag‘lub bo‘ldi.

Shu tariqa, O‘zbekiston terma jamoasi mazkur musobaqada 1 ta kumush va 1 ta bronza medallarini jamg‘arib, umumjamoa hisobida beshinchi o‘rinni qo‘lga kiritdi.

Shubhasiz, 10 ta oltin, 8 ta kumush va 15 ta bronza medallarini jamg‘argan Yaponiya terma jamoasi esa bu borada barcha ishtirokchilarni katta farq bilan ortda qoldirishga muvaffaq bo‘ldi.