Namanganning “Navbahor” jamoasini yana 3 nafar futbolchi, bosh murabbiy Andrey Antanasovich Kanchelskisning xohishiga ko‘ra, tark etdi.
Ushbu o‘yinchilarning barchasi yarim himoya chizig‘ida to‘p surishadi. Bular: Aziz Ibragimov, Shahzod Shaymanov va Ayubxon Nomanov.
O‘tgan mavsumda 34 yoshli tajribali futbolchi Aziz Ibragimov 16ta o‘yinda maydonga tushib, 524 daqiqa to‘p surib, 2ta gol urgan bo‘lsa,
27 yoshli Shahzod Shaymanov 19ta bahsda maydonga tushib, 1028 daqiqa harakatlangan hamda 2ta gol muallifiga aylangandi.
Namanganliklar tarkibiga o‘tgan mavsumning 2-davrasida qo‘shilgan 28 yoshli Ayubxon Nomanov esa 3ta o‘yinda maydonga tushib, 86 daqiqa to‘p surgandi.
Mazkur yarim himoyachilar va xabar berganimizdek, kecha “lochinlar” safini tark etgan tajribali himoyachi Jahongir Mehmonovga jamoa ustozi Andrey Antanasovich yangi mavsumda ehtiyoji yo‘q ekanligini bildirdi. Shu bois, ushbu futbolchilar “Navbahor”ni tark etishdi.
“Navbahor” klubi mazkur o‘yinchilarga jamoadagi faoliyatlari uchun o‘z minnatdorchiligini bildiradi hamda ularning keyingi faoliyatlarida omad yor bo‘lishini tilaydi.
“Navbahor” PFK matbuot xizmati.
