«Nasafnews» muxbiri Muborakning “Mash’al”  futbol klubi sobiq futbolchisi Iskandar Shaykulov bilan suhbatlashdi. Ayni paytda Jizzaxning «So‘g‘diyona» klubida to‘p surayotgan futbolchi superliganing bu yilgi mavsumi oldidan o‘z fikrlarini bildirdi.

— Iskandar, superliganing bu yilgi mavsumiga ham qur’a tashlandi. Dastlabki turda sizning jamoangiz «So‘g‘diyona» Muborakda mehmon bo‘ladi.
— Ha startni safarda boshlaymiz. Muborak men uchun begona shahar emas. U yerda 5 yil to‘p surdim, xullas dastlabki turning o‘zida qiyin bahsni o‘tkazishga to‘g‘ri keladi.

— “Mash’al” so‘nggi ikki mavsumni proligada o‘tkazdi. Avalgi jamoa bilan hozirgisining farqi bormi?
— “Mash’al” qandaydir sabablar tufayli quyi ligada ikki yil sarson bo‘ldi. Ammo jamoa o‘z joyiga qaytdi. Lekin "gazchilar" tarkibida ko‘plab tajribali futbolchilar yig‘inlarda ishtirok etishmoqda, menimcha “Mash’al”dan bu yil yaxshi natija kutsa bo‘ladi.

— Siz O‘zbekiston milliy terma jamoasining sobiq hujumchisi, ayni paytda esa tajribali yosh murabbiy qo‘l ostida to‘p surmoqdasiz. Murabbiyning kuchli-kuchsiz tomonlari nimada deb o‘ylaysiz?
— Ulug‘bek Baqoyev chindan ham tajribali murabbiy. Har qanday holatda ham jamoa ruhiyatiga o‘zining foydali ta’sirini ko‘rsata oladi. Hozirga qadar kuchsiz tomonini ko‘rmadim. Kuchli tomoni yosh ekan deb futbolchilarni zaxiraga o‘tkazib qo‘yavermaydi. Tabiatan esa ancha bosiq va xushmuomala inson, jamoamiz o‘ziga mos murabbiyga tushgan deya olaman.

— “Mash’al”da ham, “So‘g‘diyona”da ham himoyada birdek harakat qilmoqdasiz. Aytingchi tajribali yosh himoyachiga boshqa klublardan takliflar bo‘lmadimi?
— Takliflar bo‘ldi. Ammo hozir “So‘g‘diyona” bilan amalda shartnomam bor, shuningdek boshqa jamoaga o‘tishga shoshmadim. Meni Jizzaxda hammasi qoniqtiradi. Bu yil yaxshi natijalarni qo‘lga kiritishga urinamiz.

— Bu yil superligada “Paxtakor”ga kimlar raqobatchi bo‘ladi deb o‘ylaysiz?
— “Paxtakor” chindan ham hozirgi vaqtda juda kuchli tarkibga ega. Mana OCHLda ham ketma-ket ikki g‘alabani qo‘lga kiritdi. Ammo mening nazarimda “Navbahor”, “Lokomotiv” jamoalari bu yil "sherlar"ga bosh og‘riq bo‘la olishadi. Ammo mavsum boshlanmasdan avval biror aniq fikr bildirish ham mushkul. Hammasini mavsum boshlangach bilib olamiz.

Dilshod Safarov yozib oldi.