"Paxtakor" ishtirokida Toshkentda kechgan ko‘plab bellashuvlarda "Paxtakor" stadioni ishqibozlar bilan to‘lib toshgan.

Biz "sherlar"ning turli musobaqalardagi tomoshabinlar tashrifi bo‘yicha uydagi uchrashuvlar rekordini keltirib o‘tamiz. SSSR chempionati va umuman mutloq rekord 1962 yil Tbilisining "Dinamo" jamoasiga qarshi bahsda qayd etilgan. O‘shanda Sobiq Ittifoq chempionatida eng muvaffaqiyatli mavsumlardan birini o‘tkazgan jamoamiz o‘yinini tomosha qilish uchun "Paxtakor" stadioniga 65 ming muxlis tashrif buyurgan! 1962 yil uy bahslariga o‘rtacha tashrif 50 ming ishqibozdan yuqori bo‘lgan.

1963 yil Doneskning "Shaxtyor" va 1966 yil Kiyevning "Dinamo" klublari bilan to‘qnashuvni ham Toshkentda 65 mingdan muxlis kuzatgan. Xalqaro o‘rtoqlik o‘yinlarida 1964 yil Braziliyaning "Pirasikaba" hamda Urugvayning "Nasional" jamoalari bilan bellashuvlarni 60 mingdan ishqiboz stadionda tomosha qilgan.

O‘zbekiston chempionatida eng yaxshi ko‘rsatkich 1997 yil "Afrosiyob", 2000 yil Zarafshon" va 2002 yil "Qizilqum" klublariga qarshi uchrashuvlarda qayd etilgan. Mazkur bahslarni 45 mingdan ishqiboz ko‘rgan. Osiyo klublar musobaqalarida 2003 yil Tailandning "Bek Tero Sasana" jamoasi bilan o‘yinni 50 ming muxlis tomosha qilgan. Chempionlar ligasida o‘tgan mavsumda "Al Sadd"ga qarshi to‘qnashuvni 32 mingdan ziyod ishqiboz kuzatdi va bu 2003 yildan buyon kuzatilgan eng yaxshi natija bo‘ldi.