Karantin paytida yuzaga kelgan tanaffusdan foydalanib Ignatiy Nesterov haqida qiziqarli maqolani taqdim etamiz.

“Lokomotiv”ning asosiy darvozaboni O‘zbekiston milliy terma jamoasi safida Osiyo Kuboklarida maydonga tushish bo‘yicha mutlaq rekordchi hisoblanadi. Gap shundaki, Nesterov qatorasiga 5ta Osiyo Kubogida ishtirok etgan qit’adagi yagona futbolchi.

Boshlanish
Ignatiy Nesterovning dastlabki Osiyo Kubogi 2004-yil Xitoyda bo‘lib o‘tgan musobaqaga to‘g‘ri keladi. O‘shanda Yurgen Gede va Ravshan Haydarov boshchiligidagi murabbiylar shtabi 21 yoshli Ignatiyni ikkinchi darvozabon sifatida olib ketishgandi.

Nesterov bu turnirda faqat bitta o‘yinda maydonga tushgan. Guruh bosqichining oxirgi turida Turkmaniston bilan kechgan bahsda Yevgeniy Safonovga dam berilgani bois termamiz darvozasini Nesterov qo‘riqlagandi. Bu o‘yinda vakillarimiz 1:0 hisobida zafar quchgan.

Chorak finalda Bahrayn bilan kechgan bahsda yana Safonov darvozada turgan va o‘yin 2:2 hisobida yakun topib penaltilar seriyasida omad bahraynliklarga kulib boqqanini yaxshi bilasiz.

Inileev bildirgan ishonch
OFK keyingi Osiyo Kuboklarini toq yillarda o‘tkazish masalasini ko‘rib chiqadi. Shu-shu 2007-yildan beri musobaqa toq yilda o‘tkazib kelinyapti. Nesterov 2007-yilgi musobaqaga ham ikkinchi darvozabon sifatida borgandi.

Eron bilan kechgan birinchi o‘yinda bosh murabbiy Rauf Inileev Pavel Bugaloni asosiy tarkibga kiritgan. Lekin yutqazib qo‘yganimiz uchunmi yoki Bugaloning xatosi tufaylimi keyingi o‘yinlarda Nesterov darvozani qo‘riqlay boshlaydi.

Natijada yana uch yoshga ulg‘aygan Nesterov terma jamoamizning qolgan uchta o‘yinida maydonga tushib o‘zini ko‘rsatishga muvaffaq bo‘ldi. Umuman olganda, uchta bellashuvda o‘z darvozasidan atigi bitta gol olib chiqqani e’tiborga molik.

Ignatiy Nesterov Osiyo Kubogi-2007da 3ta o‘yin o‘tkazgan

Guruh bosqichi. Malayziya - O‘zbekiston 0:5
Guruh bosqichi. O‘zbekiston - Xitoy 3:0
1/4 final. Saudiya Arabistoni - O‘zbekiston 2:1

Esda qolgan turnir
Aksar muxlislar eng yaxshi Osiyo Kubogi sifatida 2011-yil Qatar maydonlarida o‘tgan musobaqani eslaydi. Vadim Abramov boshchiligidagi O‘zbekiston milliy terma jamoasi juda chiroyli o‘yin ko‘rsatgan holda yakunda 4-o‘rinni egallagandi va bu hozirgacha Osiyo Kuboklaridagi eng yaxshi natijamiz bo‘lib turibdi.

Ignatiy Nesterov bu paytga kelib ancha tajriba to‘plab qo‘ygan, shu bois musobaqaga asosiy darvozabon sifatida yo‘l olgandi. Terma jamoamiz Osiyo Kubogi-2011da oltita o‘yin o‘tkazgan bo‘lsa, shundan beshtasida Nesterov darvozani qo‘riqlagan.

Ignatiy Nesterov Osiyo Kubogi-2011da 5ta o‘yin o‘tkazgan

Guruh bosqichi. Qatar - O‘zbekiston 0:2
Guruh bosqichi. O‘zbekiston - Quvayt 2:1
Guruh bosqichi. Xitoy - O‘zbekiston 2:2
1/4 final. O‘zbekiston - Iordaniya 2:1
3-o‘rin uchun. Janubiy Koreya - O‘zbekiston 3:2

Oxirgi ikkita musobaqa
2015-yil Avstraliya va 2019-yil BAA yashil maydonlarida o‘tkazilgan Osiyo Kuboklarida ham Ignatiy Nesterov terma jamoamizning birinchi raqamli posboni sifatida ishtirok etdi. U har ikki turnirda yana o‘zini ko‘rsata oldi.

O‘tgan yil BAAda o‘tkazilgan musobaqa uning uchun beshinchisi bo‘ldi va shu munosabat bilan Ummonga qarshi bahs oldidan OFK tomonidan taqdirlandi. Nesterov shu paytgacha Osiyo Kuboklarida 17 uchrashuvda ishtirok etib, o‘z darvozasidan 15ta to‘p o‘tkazib yuborgan.

Ignatiy Nesterov Osiyo Kubogi-2015da 4ta o‘yin o‘tkazgan

Guruh bosqichi. O‘zbekiston - KXDR 1:0
Guruh bosqichi. Xitoy - O‘zbekiston 2:1
Guruh bosqichi. O‘zbekiston - Saudiya Arabistoni 3:1
1/4 final. O‘zbekiston - Janubiy Koreya 0:2

Ignatiy Nesterov Osiyo Kubogi-2019da 4ta o‘yin o‘tkazgan

Guruh bosqichi. O‘zbekiston - Ummon 2:1
Guruh bosqichi. O‘zbekiston - Turkmaniston 4:0
Guruh bosqichi. O‘zbekiston - Yaponiya 1:2
1/8 final. Avstraliya - O‘zbekiston 0:0 (penaltilar seriyasi 4:2)