Futbolchilik ko‘plab boshqa soha va kasblardan faoliyatning erta yakunlanishi bilan farq qilishi hech kimga sir emas. Hamma Zlatan Ibrahimovich emaski, deyarli 40 yoshda ham top klublar e’tiborida qolaversa. Odatda futbolchi maydondagi harakatlariga nuqta qo‘ygach futbol atrofida qolishda davom etaveradi.

"Butsasini mixga ilgan"lar uchun murabbiylik eng ko‘p uchraydigan tanlovlardan biri. Ammo, shundaylar borki o‘zlarini boshqa juda qiziq aplualarda sinab ko‘radi. Masalan — siyosatda.

Mashg‘ulotlarga qatnagan prezident

Vengriya bosh vaziri Viktor Orban bugun Yevropadagi eng mashhur siyosatchilardan biriga aylanib ulgurgan. Uning mehnat muhojirlariga nisbatan tutgan keskin mavqei, millatchi siyosati mamlakat tashqarisida ko‘p tanqid qilinsada, ichkarida uni juda hurmat qilishadi.

"Fides" partiyasi yetakchisi bir vaqtlar futbolchi bo‘lganini esa ko‘pchilik bilavermaydi. Aslida bu tushunarli. Chunki, mojarlar yetakchisi nomdor futbolchi emasdi. O‘ynagan klubi ham Vengriya uchinchi ligasidagi nomsiz "Felchut" edi. Ammo, uning o‘zi futbolni juda sevardi. Keyinchalik u "Felchut"ni sotib oldi. Klub bazasida mashhur venger Ferens Pushkash akademiyasini ochdi.

Mutasaddilar ikkimingchi yillarda parlament yig‘ilishlari Orbanning mashg‘ulotlariga to‘g‘ri kelib qolmasligi uchun harakat qilishar edi, hatto. U o‘sha davrda davlat prezidenti edi. 2004 yilda esa u siyosatdan biroz chekinib, o‘z qadrdon klubida bosh murabbiy bo‘lgani haqida ma’lumotlar mavjud.

Orban ma’lum vaqt dunyodagi eng mashhur siyosatchiga aylangan futbolchi edi. Aynan esa Jorj Vea Liberiya prezidentligi uchun saylovlarda g‘olib bo‘lmaguncha. Bu haqda alohida yozaman, nasib.

Orif Tolipov.