Pro liga 8-turi doirasidagi «Dinamo» - «Neftchi» (0:1) uchrashuvidan keyin farg‘onaliklar bosh murabbiyi Asad Do‘rmonov o‘yin haqida to‘xtaldi.

«Bilasiz, «Dinamo» va «Neftchi» o‘rtasida uzoq yillardan buyon o‘zaro jiddiy kurashlar bo‘lib kelgan. 20-asrda sobiq Ittifoq vaqtida ham doimo «Dinamo» va o‘shanda jamoamiz nomi «Neftyannik» deyilardi, ikki jamoa kurashib kelgan. O‘zim to‘p surgan vaqtlarimda ham Samarqanddagi o‘yinlarimiz hech qachon oson kechmasdi. O‘yindan avval shogirdlarimizga ham «Dinamo» bilan o‘yinlarimiz tarixi haqida gapirdim. Qolaversa, «Dinamo» o‘yin jihatdan katta o‘sishga erishganligi natijalaridan ham ko‘rinib turgandi. Samarqand klubi o‘yinlari takrorini tomosha qilib, jiddiy o‘rgangan edik. Bu klub to‘p bilan ko‘proq harakat qiladi. Yigitlarga rahmat qiyin va asosiy raqib ustidan g‘alaba qozona olishdi. Gol urib himoyada ishonchli to‘p sura oldik. Umuman olganda, «Neftchi» maydonda borini berdi.

Oxirgi 5ta o‘yinimizdan 4tasini safarda o‘tkazdik. Hech bir bahs aslida oson o‘tmadi. Bugun Samarqandda mavsumdagi eng muhim g‘alabamizga erishdik, desam bo‘ladi. O‘yin oldidan «Dinamo»ga qarshi jiddiy tayyorgarlik ko‘rgandik.

Jamoamiz oldidagi bosh vazifa Superligaga qaytish. «Istiqlol» Pro ligani tark etgach, aksariyat klublar qatori bizdan ham 3 ochko olib tashlandi. Chunki ularni mag‘lub etgandik. Endi keyingi o‘yinlarda bu ochko o‘rnini ham to‘ldirishimiz kerak.

Klubdagi muammolar? Hammada bor muammolar bizda ham bor, ammo biz hammasini bir chetga surib faqat g‘alaba uchun o‘ynayapmiz. Natija bo‘laversa, hammasi yaxshi bo‘ladi», - deydi «Neftchi» bosh murabbiyi Asad Do‘rmonov.