Angliyaning «Manchester Yunayted» klubi yarim himoyachisi Brunu Fernandesh jamoa bosh murabbiyi Ole Gunnar Sulsher bilan munosabatlari yomonlashgani haqidagi mish-mishlarga oydinlik kiritdi.

Xabarlarga ko‘ra, Fernandes «Tottenxem» klubiga qarshi o‘yin paytida almashtirib yuborilganidan g‘azablangan.

«Bu haqda juda ko‘p mish-mishlar tarqatildi. Avvaliga jamoadoshlari bilan tortishgani haqida, keyin esa Lindelyof bilan ziddiyatga borganim haqida, endi esa Sulsher bilan munosabatlarim yomonlashgani haqida yozishmoqda. Aslida esa unday emas, chunki, men jamoam haqida qayg‘uraman.

Hech kim bilan hech qanday ziddiyat bo‘lmagan. Sulsher bilan janjallashganim haqida yozishayotgani – g‘irt bema’nilik. OAV meni Sulsher bilan teskari qilib qo‘ymoqchi. Nega bunday qilishayotganini to‘g‘risi tushunmayapman.

Iltimos, mish-mishlarni keltirib chiqarish uchun mening, jamoadoshlarimning va bosh murabbiyimizning nomlaridan foydalanmanglar!», — dedi Fernandesh.