Superliganing 19-tur doirasida bo‘lib o‘tgan Mash’al" hamda AGMK jamoalari o‘rtasidagi uchrashuvdan keyingi tashkil etilgan matbuot anjumanida "AGMK" jamoasi bosh murabbiyi Mirjalol Qosimov ishtirok etdi.
- Uchrashuv kurashlarga boy bo‘ldi. Birinchi bo‘limda maydon egalarining xatosi tufayli hisobda oldinga chiqib oldik. O‘ylaymanki, keyingi o‘yinlardan o‘z ritmimizga tushib olamiz. Yuzaga kelayotgan katta tanaffuslar jamoani o‘z ritmidan chiqarib yuboryapti. "Mash’al" jamoasi ham bugun o‘yin namoyish etmadi. Ularning keyingi o‘yinlariga omad tilayman.
- AGMK keyingi turni "Nasaf" jamoasiga qarshi o‘tkazadi...
- Har bir o‘yinga tayyorgarlik ko‘rganimiz kabi "Nasaf" jamoasiga ham shunday tayyorgarlik ko‘ramiz. "Nasaf" jamoasi tarkibida yosh, g‘alabaga chanqoq futbolchilar bor. Berdiyev yaxshi jamoani shakllantirmoqda. Qisqa qilib aytganda, "olti ochkolik" o‘yin bo‘ladi.
- Bugun AGMK kam hujum qilib g‘alabani "ilib" ketdi.
- Haqiqatdan ham og‘ir o‘yin bo‘ldi. Birinchi bo‘lim ham, ikkinchi bo‘lim ham qizg‘in kurashlarga boy bo‘ldi. Biz esa aql bilan o‘ynadik. O‘rtada yuzaga kelgan tanaffus jamoaning o‘yinini ritmidan chiqarib yuborganini yuqorida aytdim. Yuzaga kelgan tanaffus futbolchilarning jismoniy holatiga ta’sir ko‘rsatadi.
- Futbolchilar maydon holatidan shikoyat qilishmadimi?
- Maydon holatidan hech kim e’tiroz qilmadi. Muborakda har doim maydon yaxshi bo‘lgan. Qolaversa, hozir kuz fasli, maydon yumshoq bo‘ladi.
