O‘zbekistonda navbatdagi futbol mavsum yakuniga yetganidan so‘ng taniqli Transfermarkt portali Superligada ishtirok etgan futbolchilarning yangi narxini e’lon qildi.
Yakunlangan mavsum «Paxtakor» klubi uchun omadli keldi. Jamoa O‘zbekiston chempionati va O‘zbekiston kubogida g‘olib chiqish bilan birgalikda, Osiyo chempionlar ligasida chorak finalgacha yetib bordi. Tabiiyki, ushbu jamoa o‘yinchilarining narxlari o‘sdi.
Paxtakorchilar yetakchisi Jaloliddin Masharipov barcha musobaqalar doirasida 10ta gol urib, 23ta golga uzatma berdi. Natijada uning narxi 2 mln. yevroga yetdi. Ushbu narx bilan Jaloliddin o‘zbekistonlik futbolchilar orasida Aziz G‘aniyevdan o‘tib ketgan holda 3-o‘ringa ko‘tarilib oldi. Bu borada Eldor Shomurodov (6,5 mln. yevro) va Otabek Shukurov (2,5 mln. yevro) yetakchi bo‘lib turishibdi.
Shuningdek, «Paxtakor»ning yana 3 nafar futbolchisining narxi oshdi. Doston Hamdamovning narxi 300.000 yevroga oshdi va 1,2 mln. yevroga yetdi. Odiljon Hamrobekovning bahosi 250.000 yevroga oshib, bir million yevrolik marraga yetdi. Hojiakbar Alijonov esa 900.000 yevroga baholandi (+200.000).
Darvoqe, Superliga to‘purari Dragan Cheranning narxi 100 mingga tushdi va hozirda 750 ming yevroga baholandi. Bunga uning 33 yoshga kirgani sabab bo‘ldi.
«Nasaf» darvozaboni Abduvohid Ne’matov narxi eng ko‘p ko‘tarilgan o‘zbekistonlik futbolchilardan biri bo‘shlgan. Uning narxiga 300 ming yevro qo‘shildi va 600 mingga yetdi. 19 yoshli futbolchi yakunlangan mavsumda eng barqaror o‘yin namoyish etgan posbonlardan biri bo‘ldi. Qarshiliklar hujumchisi Bobur Abduxoliqov (17ta gol) ham o‘sishga erishdi — 900.000 yevro (+250 ming yevro).
