Toshkentning «Lokomotiv» klubi sobiq bosh murabbiyi Andrey Fyodorov Moskvaning «Lokomotiv»ida ish boshladi. U katta seleksioner lavozimiga qabul qilindi.

49 yoshli mutaxassis futbolchilik faoliyati davomida 2000-2008 yillarda «Rubin» sharafini himoya qilib, Rossiya chempionligini qo‘lga kiritgan. U O‘zbekiston terma jamoasi safida 64ta o‘yinda maydonga tushgan.

Fyodorov 2008 yilda futbolchilik faoliyatini yakunlaganidan so‘ng «Rubin» seleksiya bo‘limi boshlig‘i vazifasida ish boshlagan bo‘lsa, keyinchalik qozonliklar yoshlar jamoasini boshqargan.

Shundan so‘ng mutaxassis 2015 yilda O‘zbekistonda murabbiy sifatida ishladi. 2015 yilda u «Neftchi», 2018 yilda esa «Lokomotiv»ni qabul qilib oldi. "Temiryo‘lchilar" uni 2020 yilning 20 avgust kuni iste’foga chiqargan edi.

"Men uzoq yillar davomida «Rubin» seleksiya bo‘limini boshqarganman. Ushbu vazifaga yana qaytganimdan xursandman. Bunday katta klub meni o‘z safiga chorlaganidan xursandman. «Lokomotiv» rivojlanishi va yuqori pog‘onalarda yurishi uchun qo‘ldan kelgan barcha ishni qilamiz. Mening so‘nggi ish joyim «Lokomotiv» (Toshkent) bo‘lgandi. Shahar o‘zgardi, ammo nom o‘sha-o‘sha. Men temiryo‘lchi bo‘lib qoldim, bu yoqimli.

Mening ishim keng qamrovli: murabbiyning istaklarini, klub strategiyasi va imkoniyatlarini inobatga olgan holda, masalalarni kengashgan holda hal qilish kerak. «Lokomotiv» safida yosh yigitlar ko‘p. Ular kelajakda asosiy jamoani kuchaytirishlari mumkin. Akademiya bilan hamkorlik ishlaymiz", — dedi Fyodorov "Lokomotiv" matbuot xizmatiga bergan intervyusida.