Bugun “Navbahor” jamoasi uy uchrashuvlarini o‘tkazadigan “Markaziy” o‘yingohning matbuot anjumani zalida “Navbahor” PFK rahbariyati murabbiylar bilan yig‘ilish o‘tkazdi. Unda klub vise-prezidenti Otabek  Samatov, klub sport direktori Dilshod Aliyev, jamoaning maslahatchi-murabbiyi, tajribali mutaxassis Viktor Jalilov, “Navbahor – farm” jamoasi bosh murabbiyi Rashid G‘ofurov, “Navbahor – U-21” yoshlar jamoasi murabbiylari – Usmon Asqaraliyev va Alisher Mahmudov, “Navbahor – U-18” jamoasi murabbiyi A’zam Rajabboyev ishtirok etishdi.

Yig‘ilish davomida Otabek Samatov Namangan viloyat hokimi, viloyat futbol assosiasiyasi prezidenti Shavkat Shokirjonovich Abdurazzoqov ta’kidlaganidek, bu yildan klubning strategiyasi o‘zgartirilib, asosiy e’tibor viloyatimizdagi iqtidorli hamda mahoratli futbolchilarga qaratilishi, bu borada “Navbahor”ning barcha toifadagi murabbiylari bahamjihatlikda, o‘zaro birlikda, fikr almashgan holda ish olib borishlari lozimligi, aynan viloyat rahbarining tashabbusi bilan Davlatobod tumanidagi sobiq “Sport” mehmonxonasi qayta ta’mirlanib, “Navbahor”ning farm va U-21 yoshlar jamoalari uchun qarorgoh (baza)ga aylantirilishi vazifasi belgilanganligi, tez orada bu borada ishlar boshlanishi, iqtidorli futbolchilar kelajakda “Navbahor” tarkibidan o‘rin olib, jamoaning zafarlariga o‘z hissalarini albatta qo‘shishlari, shuningdek, xalqaro musobaqalarda yurtimiz bayrog‘ini baland ko‘tarishlarini ta’kidladi.

Viktor Jalilov ham Namangan iqtidorli futbolchilarga boy viloyat ekanligi, faqat ularning iqtidorlarini to‘g‘ri yo‘naltirish lozimligini aytib o‘tdi.

Ushbu masalalar yuzasidan murabbiylar ham o‘z fikrlarini bildirib o‘tishdi hamda iqtidorli futbolchilarga ko‘proq e’tibor qaratishlarini ta’kidlashdi.

“Navbahor” PFK matbuot xizmati.