O‘zbekiston ayollar milliy terma jamoasi Turkiyaning Antaliya shahrida tashkil etiladigan “Festival Women’s Trophy 2021” xalqaro turnirida qatnashidan xabaringiz bor.

15-24 fevral kunlari bo‘lib o‘tadigan mazkur musobaqada O‘zbekiston vakillari qur’aga ko‘ra Ekvator Gvineyasi, Nigeriya hamda Zambiya ayollar terma jamoalariga qarshi kurash olib borishi kerak edi. Ammo Zambiya futbol assosiasiyasi milliy jamoani turnirga yubormaydigan bo‘ldi.

"Zambiya futbol assosiasiyasi shuni ma’lum qiladiki, mamlakat ayollar terma jamoasi Turkiyada tashkil etiladigan 8 jamoa ishtirokidagi musobaqada ishtirok eta olmaydi. Bunga Covid-19 bilan bog‘liq vaziyat sabab bo‘ldi. Zambiya ayollar terma jamoasi a’zolari Covid-19ga bir necha marta test topshirishdi. Natijada jamoaning musobaqadagi ishtiroki bekor qilindi", — deyiladi Zambiya futbol assosiasiyasi tarqatgan xabarda.

Eslatib o‘tamiz, O‘zbekiston terma jamoasining Zambiyaga qarshi o‘yini 23 fevral sanasiga belgilangan edi. Bahrom Norsafarov murabbiyligi ostidagi ayollarimiz 17 fevral kuni Ekvator Gvineyasi, 20 fevral kuni Nigeriyaga qarshi maydonga tushishadi.

Ma’lumot o‘rnida. Zambiya ayollar terma jamoasi esa 2021 yilgi Tokio Olimpiadasi yo‘llanmasini qo‘lga kiritgan Afrika qit’asining yagona jamoasi hisoblanadi.