"Real" klubi rahbariyati yarim himoyachi Kazemironing Yevropa chempionlar ligasi nimchorak final bosqichi javob o‘yinidagi diskvalifikasiyasini bekor qildirmoqchi. Bu haqda "Marca" xabar tarqatdi.

Manbaga ko‘ra, madridliklar "Atalanta"ga qarshi bo‘lib o‘tgan dastlabki o‘yinda braziliyalik futbolchiga ogohlantirish nohaq berilgan, deya hisoblashmoqda. Ya’ni, "Real" rahbariyatining fikricha, Kazemiro bergamoliklar hujumchisi Duvan Sapataga nisbatan qoidabuzarlik qilmagandi. Mazkur ogohlantirish 29 yoshli futbolchi uchun YECHL doirasidagi uchinchisi bo‘ldi hamda, mazkur "sariq" bekor qilinmasa, u javob bahsini o‘tkazib yuboradi.

Kazemiro joriy mavsumda "Real" safida barcha musobaqalar doirasida 29ta o‘yinda maydonga tushib, 6ta gol urdi va ikkita golga uzatma berdi. Uning madridliklar bilan shartnomasi 2023 yilga qadar tuzilgan.