Mana son-sanoqsiz mish-mishlar, uzoq kutishlar va transferlar oynasidan so‘ng Jeydon Sancho «Manchester Yunayetd»ga kelib qo‘shildi. Ingliz vingeri klubga 73 million funt sterlingga tushdi. Bu esa reja bo‘yicha «qizil iblislar» hujumini kuchaytirishga xizmat qilishi kerak. O‘tgan mavsumda klub Premiyer ligada jami 73 ta gol urgan. Sanchoning jamoaga qo‘shilishi bilan hujum yanada rang-barang ko‘rinishga ega bo‘ladi. Sulsherning yangi mavsumdagi hujum chizig‘i haqida ikki og‘iz fikr bildiramiz.
Sanchoning kelishi endilikda klubning yosh uelslik futbolchisiga kamroq daqiqalar taqdim etadi. Jeyms o‘tgan mavsumda Premiyer ligada jami 900 daqiqadan ko‘proq harakat qilgan. Ushbu shartnoma Markus Reshfordning pozisiyasiga ham ta’sir etishi mumkin. U endilikda chap qanot hujumchisidan farqli o‘laroq, markazlashadi. O‘tgan mavsum Sulsher jamoasida Kavani va Grinvud juftligi yaxshi samar berganiga guvoh bo‘lgandik. Yosh futbolchining tezligi va tajribali forvardning harakatlari muvaffaqiyatli chiqqan edi. Sanchoning kelishi esa bu juftlik harakatlariga ijodiylik qo‘shishi mumkin. 2020-2021 yilgi mavsumda chapda Marsial o‘ngda esa Reshford ko‘proq harakat qildi. Edinson esa asosan markaz bilan bog‘langan edi.
Marsial o‘tgan mavsum ancha kam ko‘rinish berdi va to‘rtta gol ura oldi, xolos. Yangi mavsumdan Sancho va Marsial tandemi hosil qilinsa, uning yordami bilan fransuzning ishlari yurishib ketishi aniq. «Borussiya»da 137 ta o‘yinda 64 ta golli uzatma qayd etgan Sanchodan mahsuldorlik kutish o‘rinli bo‘ladi, albatta. Bu borada norvegiyalik mutaxassis qarorlariga ko‘p narsa bog‘liq. Agar yuqoridagi juftlik varianti sinab ko‘rilsa, foydadan holi bo‘lmaydi.
Sulsher endi har bir o‘yinda Kavaniga imkoniyat bera olmaydi. Negaki, uni qo‘lida yetarlicha tanlov mavjud. Oldinda 3 ta ingliz yoshlarining harakati katta ehtimol bilan o‘zini oqlaydi. Ularni ustunligi esa asosan tezligida. Reshford va Grinvud o‘yin davomida almashinib harakat qilishiga hojat qolmaydi. Chunki endi maydonda ularni bog‘laydigan Sancho bo‘ladi. Shuni ham ta’kidlash kerakki, Sulsher hujumida Reshford o‘ta muhim figuraga aylangan. U o‘tgan mavsum davomida barcha turnirlarda 57 marta maydonga tushgan. Bu klub miqyosida ikkinchi ko‘rsatkichdir. Kavani esa kechroq maydonda harakat boshlaganiga qaramay, so‘nggi 11 ta o‘yinda 10 ta gol va 3 ta assist muallifiga aylandi. Umuman olganda endi Sulsher hujumda istaganicha ijodkorlik qilishi mumkin. Bugun klub odindagi uch inglizdan tashqari, Kavani, Jeyms Diallo kabi ijrochilarga ega bo‘ldi. Yana shuni ham unutmaslik kerakki, ularni sifatli uzatma bilan ta’minlab turuvchi Bruno Fernandesh ularning ortida harakat qiladi.
Ingliz tilidan Jaloliddin ISMATOV tarjimasi
