Tokio-2020 paralimpiadasining navbatdagi kuni ham boshlanib ketdi. Uch nafar suzuvchimiz saralash bahslarida ishtirok etishdi.

Erkaklar o‘rtasida S13 tasnifida 100 metr masofaga brass usulida suzish bo‘yicha saralash bahslarida hamyurtimiz Firdavsbek Musabekov ishtirok etdi. U 1:06.42 daqiqa vaqt bilan o‘z guruhida 2-o‘rinni egalladi va final yo‘llanmasiga ega bo‘ldi.

Eslatib o‘tamiz, Musabekov ishtirokidagi final bahsi bugun Toshkent vaqti bilan soat 15:02 da boshlanadi.

Shuningdek, biroz avval para suzish bo‘yicha ayollar o‘rtasida S13 klassida 100 metr masofaga brass usulida suzish bo‘yicha saralash bahslari yakunlandi. Ushbu saralashda 2 nafar hamyurtimiz – Shohsanamxon Toshpo‘latova hamda Nigoraxon Mirzohidova ishtirok etdi. Toshpo‘latova 1:21.60 daqiqa vaqt bilan 4-o‘rinni egalladi va final yo‘llanmasiga ega bo‘ldi. Afsuski, 1:28.12 daqiqa vaqt sarflagan Mirzohidova marraga 7-o‘rinda yetib keldi va saralashdan o‘ta olmadi.

Eslatib o‘tamiz, Shohsanamxon Toshpo‘latova ishtirokidagi final bahsi bugun Toshkent vaqti bilan soat 15:08 da boshlanadi.