Oʻzbekiston futbol assotsiatsiyasida Litvada boʻlib oʻtgan Jahon Chempionatida muvaffaqiyatli ishtirok etgan Oʻzbekiston milliy terma jamoasi futzalchilari bilan uchrashuv boʻlib oʻtdi. Unda OʻFA birinchi vitse-prezidenti Ravshan Ermatov, futzal delegatsiyasi rahbari Jahongir Usmonov hamda assotsiatsiya bosh kotibi Avaz Maksumov ishtirok etishdi.

Ravshan Ermatov futzalchilarni OʻFA prezidenti Abdusalom Azizov nomidan, qolaversa, butun futbol jamoatchiligi nomidan mundialda qayd etilgan tarixiy natija bilan tabrikladi. Ushbu natijaning ortida katta sai-harakatlar va jamoaviy mehnat yotganini taʼkidlab oʻtdi.

Futzalchilarmiz yil boshidan beri Tailand, Ispaniya va Portugaliyada yigʻinlar oʻtkazdi, oʻz qitʼasida yetakchi hisoblangan va jahonda oʻz oʻrniga ega boʻlgan Argentina, Ispaniya, Portugaliya, Eron va Venesuela kabi jamoalar bilan oʻrtoqlik uchrashuvlari oʻtkazishdi. Terma jamoaning Jahon Chempionatiga yetarlicha tayyorgarlik koʻrishi uchun kerakli barcha sharoitlar taqdim etildi.

Futzal terma jamoamizning ancha yosh boʻlganligi sababli keyingi musobaqalarda  yanada yuqori natijalar qayd etishlariga ishonch bildirildi. Oʻz navbatida, jamoa nomidan terma jamoa sardori Rustam Umarov OʻFAga eʼtibor uchun minnatdorchilik bildirgan holda assotsiatsiya muzeyiga esdalik sovgʻasini topshirdi. Tadbir yakunida futzalchilar pul mukofotlari bilan taqdirlandilar.