Avval xabar berganimizdek, professional futbol klublariga ajratilayotgan mablag‘larning maqsadli sarflanishini monitoring qilish, klublarning infratuzilma va akademiyani rivojlantirish, shuningdek, maydonlarni xalqaro standartlarga moslashtirish va ularni sifatli saqlashga yo‘naltirishini ta’minlash maqsadida professional futbol klublarining yillik xarajatlar smetasi O‘FA bilan kelishilgan holda tasdiqlanishi belgilandi.

Yillik xarajatlar smetasi asosida moliyaviy mablag‘larni ajratilishida, xususan, stadion va maydon parvarishiga ustuvor maqsad bo‘ladi.

Bugun O‘FA birinchi vise-prezidenti Ravshan Ermatov maydoni yangilanayotgan JAR majmuasini borib ko‘rdi.  

Tashrif davomida mas’ullar bilan suhbatlashib, futbol klublarining maydonlarini yaxshilash, stadionlar holatini xalqaro standartlarga moslashtirish borasida fikr almashildi.

Ravshan Ermatov maydonlar bevosita futbolning sifatiga ta’sir qilishi, ularni o‘yinlarga tayyorlash va chimlarni doimiy nazorat ostida ushlash kerakligini aytdi. Buning uchun, futbol maydonini sifatiga ham ilmiy yondashish va yurtimizda zamon futboliga munosib maydonlarni puxta tashkil etish zarurligini ta’kidladi.

JAR majmuasidagi maydonni ham mamlakatimiz iqlimini inobatga olgan holda uzoq muddatli xizmat qiladigan etib tayyorlash bo‘yicha mutaxassislarga topshiriq berildi.