Kecha o‘z uyida yangi mavsum tayyorgarligini boshlagan Bekobodning “Metallurg” jamoasi tarkibini ikki nafar yangi futbolchi bilan to‘ldirdi. Ulardan biri darvozabon Akmal Ortiqov bo‘lsa, ikkinchisi himoyachi Farhod Bekmurodovdir. Har ikkala futbolchili bilan rasman shartnoma imzolandi.

Tajribali darvozabon Akmal Ortiqov o‘tgan mavsumni Superliga debyutanti “Turon” jamoasida o‘tkazib, muxlislarda iliq taassurot qoldirgandi. Bekobodliklar safida Akmalning mahorati qo‘l kelishi aniq. U jamoaning birinchi raqamli posboni Aleksandr Lobanovga tarkibda sog‘lom raqobat ko‘rsatishiga ishonamiz. Qiziq jihati Ortiqov “Metallurg”ga jamoani tark etgan adashi – Akmal Tursunboyev o‘rniga jalb etildi.

Akmal Ortiqov kuchlilar safida 2012 yilgi mavsumdan faoliyat yuritib kelayapti. U turli yillarda “Navbahor”, “Olmaliq”, “Andijon”, “Turon” jamoalari tarkibida faoliyat yuritdi. Asosiy tarkibda 53 uchrashuvda maydonga tushdi. 5 marta ogohlantirilgan.

Farhod Bekmurodov esa bekobodliklar safiga “Qo‘qon 1912” jamoasidan kelib qo‘shildi. Aslida “Metallurg” Bekmurodovga bir necha mavsum ilgari – “Andijon”da o‘ynab yurgan kezlari “ko‘z tikkandi”. Farhod Superliganing tajribali yarim himoyachilaridan biri sanaladi. U faoliyati davomida “Andijon”, “Lokomotiv” hamda “Qo‘qon 1912” jamoalari tarkibida 88 ta uchrashuvda maydonga tushgan. Raqiblar darvozasiga 4 ta gol kiritgan. 25 marta ogohlantirilgan.