O‘FA hakamlar bo‘limi boshlig‘i Erkin Baxtiyorov Superliga bahslarida ishlaydigan hakamlar uchun o‘quv-yig‘in mashg‘uloti haqida fikr bildirdi.
- Hakamlarning mavsumga tayyorgarlik darajasini sinovdan o‘tkazishga mo‘ljallangan an’anaviy yig‘inlarimizga yanvar-fevral oylarida butun respublikadan 170 dan oshiq arbitr tashrif buyurishi rejalashtirilgan. Bu orqali fevral oyining oxiriga borib hakamlarning mavsum davomida qaysi musobaqada ishlashiga oydinlik kiritiladi.
Bugun 1-guruh bilan o‘quv-mashg‘ulot yig‘inini boshlab yubordik. Ertalab jismoniy tayyorgarlik bo‘yicha olingan normativ testlardan 2 nafar referi o‘ta olmadi.
2022 yilda VAR tizimining qamrovini kengaytirishimiz kerak. Ilk yig‘inlardan ko‘zlangan asosiy maqsad ham VAR hakamlari sonini oshirish va ularning VAR-simulyatorida ko‘proq mashq qilishlarini ta’minlash.
Bugun start olgan yig‘inda tojikistonlik, 24 yanvarda boshlanadiganida esa qirg‘izistonlik referilar ishtirok etishlarini ham alohida ta’kidlash kerak. Bu TFF hamda QFI bilan imzolangan hamkorlik memorandumi asosida tashkil qilinyapti.
