Portugaliya terma jamoasi va «Manchester Yunayted» hujumchisi Krishtianu Ronaldu FIFAdan olgan maxsus sovrini haqida fikr bildirdi.
Eslatib o‘tamiz, o‘tgan yili Ronaldu Ali Dayeining rekordini yangilab, terma jamoalar tarixidagi eng yaxshi to‘purarga aylangan edi.
«Men FIFAga katta hurmat bilan qarayman va bu tashkilotdan maxsus mukofot olganimdan xursandman.
Oilamga alohida rahmat aytmoqchiman. Tez orada yana ota bo‘laman. Milliy terma jamoa tarixidagi eng yaxshi to‘purar bo‘lish ajoyib.
Menda hali ham o‘yinlarga yuqori ishtiyoq bor va gol urishni yaxshi ko‘raman. Men alohida g‘ayrat bilan mashq qilaman.
37 yoshdaman, lekin o‘zimni juda yaxshi his qilyapman. Men yana ko‘proq o‘ynashga tayyorman. Yana 4-5 yil maydonda bo‘lishni kutyapman.
Tanamga yaxshi g‘amxo‘rlik qilaman. O‘z o‘rnida ertami-kechmi u ham sizga shunday munosabat bilan rahmat aytadi», - deydi Ronaldu.
