Shu yilning 20 yanvar kuni Botken-O‘sh trassasida ro‘y bergan avtohalokat natijasida «Oloy» klubining ikki nafar futbolchisi vafot etdi. Bu haqda O‘sh shahar post patrul xizmati xabar tarqatmoqda.

Xabarga ko‘ra,  Nookat shahridan O‘sh shahriga kiraverishda ikki avtomobil  — Mercedes va Hyundai Porter to‘qnashib ketgan. Hodisa oqibatida ikki nafar inson hayotdan ko‘z yumgan, bir nafari esa og‘ir jarohat olgan.

O‘shning «Oloy» klubi o‘zining "Instagram"dagi rasmiy sahifasida avtohalokat natijasida jamoaning ikki nafar futbolchisi — 23 yoshli Jaxongir Maxmudov va 21 yoshli Asad Alimovlar vafot etgan.

Klubdagilarning xabariga ko‘ra, Alimov avvallari «Oloy» klubining yoshlar tarkibida o‘ynagan va 2020 yilning yanvar oyida asosiy tarkibga qo‘shilgandi.

Jaxongir Maxmudov esa jamoa tarkibiga 2018 yilning yanvar oyida kelib qo‘shilgandi.

«Asadbek va Jaxongirlarni jamoadoshlari va murabbiylar qattiq hurmat qilishardi. Ular mehribon, xotirjam va e’tiborli insonlar sifatida qadrlanardi. Rahbariyat, murabbiylar shtabi va futbolchilar bu yo‘qotish uchun qayg‘uradi va oila-a’zolariga hamdardlik bildiradi. Biz Jaxongir va Asadbeklar haqida yaxshi xotiralarni saqlab qolamiz», — deyiladi klubning rasmiy bayonotida.

«Nur-Botken» klubining tarqatgan ma’lumotiga qaraganda, futbolchilar yaqinda ular bilan shartnoma imzolagan va klub safiga qo‘shilishlari kerak edi.

«Ular 10 yanvardan 20 yanvargacha Batkenda ko‘rikdan o‘tishgandi va jamoamiz bilan shartnoma imzolashgandi. O‘zbekistonda bo‘lib o‘tadigan turnirda ishtirok etishlari kerak edi va 23 yanvargacha dam olish uchun o‘z uylariga ketishayotgandi. Klub va shahar nomidan Asadbek va Jaxongirlarning oila-a’zolariga chuqur hamdardlik bildiramiz», — deyiladi klubning "Instagram"dagi rasmiy sahifasida.