Kecha Superliganing birinchi tur doirasida "Metallurg" hamda AGMK jamoalari o‘rtasidagi o‘yinni boshqargan Firdavs Norsafarovning harakatlaridan mehmonlar qoniqish hosil qilmaganini ochiq bayon qilishdi.
"Firdavs Norsafarov negadir o‘yin davomida ikki xil standartlar bo‘yicha qaror chiqardi. AGMK foydasiga, "Metallurg" zarariga bo‘lgan vaziyatlarni yumshoqlik bilan, imtiyozlar taqdim etgandek tuyuldi. Aksincha, AGMK zarariga, "Metallurg" foydasiga esa qattiqqo‘l hakam rejimida, hammasini to‘g‘ri qilayotgandek yuqori ishonch bilan qarorlar chiqardi.
Aslida esa uchrashuvda mezbon jamoa vakillari o‘ta qo‘pol harakatda bo‘lishgani, keskin choralar bizning futbolchilarga nisbatan ishlatilgani ko‘plab savollarni yuzaga keltirmoqda.
Superliga va O‘zbekiston kubogi doirasida o‘tgan mavsumdagi oxirgi o‘yinlari, darvozamizga belgilangan penaltilar va yangi mavsum ham o‘tgan yilgi finishdagidek boshlangani umuman tushunarsiz holat. Hakamlar qoidani oxirgi o‘yinlarda AGMK zarariga to‘g‘rilab, raqib foydasiga ishlatish tajribasini keng qo‘llashmoqda.
Fakt shuki, oxirgi 3 o‘yinda jamoamiz darvozasiga 4ta penalti va jamoamiz futbolchilariga 3ta qizil kartochka ko‘rsatildi.
O‘ylaymizki, shikoyatni tegishli tashkilot vakillari ko‘rib, o‘rganib, tahlil qilib, keyin oqilona qaror chiqarishadi. Umid qilamizki, kelgusida hakamlar AGMK o‘yinlarida ikki xil standartdagi qarorlarni mavjud standartlar asosida barchaga teng holatda qo‘llashadi" - deyiladi AGMKning rasmiy bayonotida.
